فروة الراس ما محتاجة تتفرك لحدي ما تصرصر عشان تكون نظيفة، ومع ذلك مقشرات الفروة بقت أساسية في روتينات كتيرة: سكر وملح وقهوة من جهة، وساليسيليك وجلايكوليك من الجهة التانية، وكلهم بتباعوا تحت وعد واحد: «نظفي المسام وخلي الشعر ينمو». لكن التقشير ممكن يكون سر النظافة الصحيح، وممكن برضو يفتح باب التهاب وحكة لو اتعمل على جلد ما محتاجو أو بطريقة عنيفة.
الفروة جلد حي بجدد خلاياه بصورة طبيعية، لكن الزهم والعرق وبقايا الكريمات ممكن تتجمع مع الزمن، خصوصاً في الشعر الكيرلي والمجعد لأن فترات الغسيل متباعدة والروتين غني بالمرطبات، وتراكمات الفروة محتاجة تعامل مختلف عن نشاف الأطراف.
مقشرات الفروة بتنقسم لنوعين:
- المقشرات الفيزيائية (الميكانيكية): بتعتمد على الاحتكاك لإزالة القشور، زي حبيبات السكر والملح والفرش الخشنة. المشكلة هنا في القوة؛ حبيبات الملح والسكر حوافها حادة، ولو دخلت معاها الأظافر والفرك العنيف فوق فروة فيها حكة، حتخدش الجلد وتزيد الاحمرار، وتفتكر الحرقان دليل نظافة، بينما الجلد قاعد يرسل إنذار، لو الفروة سليمة وفيها تراكم خفيف، فتدليك هادئ بأطراف الأصابع أو بفرشة سيليكون لينة أثناء الشامبو بكفي تماماً، من غير ما نحول الغسيل لسنفرة بتلف جذور الشعر وتكسرها.
- المقشرات الكيميائية: بتذوب التراكمات بدون حك، وأشهرها حمض الساليسيليك (Salicylic acid)، وهو ذائب في الدهون فبقدر يخترق الزهم ويفك الروابط بين الخلايا الميتة (تأثير حالّ للقشور Keratolytic). في دراسات سريرية أظهرت إن دمج الساليسيليك في الشامبوهات بحسن أعراض الصدفية والتهاب الجلد الدهني المتوسط إلى الشديد خلال أسابيع، لكن النتائج دي بتعود للتركيبات الطبية المتكاملة موش للحمض براهو. أما حمض الجلايكوليك (Glycolic acid) فبشتغل على السطح، ودليلو في الفروة أضعف، ووجودو في عبوة «Detox» ما بخليهو علاج للقشرة.
للزولة الفروتها هادئة لكن بتتراكم فيها المنتجات، التقشير الكيميائي اللطيف كل أسبوعين أو أربعة أسابيع بكون خطوة مساعدة معقولة، لكن التقشير ممنوع تماماً وقت الفروة تكون متهيجة، فيها احمرار أو جروح، أو بعد الفرد والصبغة مباشرةن ولو بتستعملي علاجات طبية، الملصق الرسمي للمينوكسيديل بيحذر من استخدامو على فروة متهيجة أو مقشرة بعنف.
التقشير ما بنبت الشعر ولا بصحي البصيلة، فائدتو الوحيدة تجهيز بيئة نظيفة عشان العلاج يتوزع أحسن، ولو سبب التساقط داخلي (حديد، غدة، صلع وراثي)، أنظف فروة في الدنيا ما حتحل المشكلة براها.
في الحلقة الجاية حنقفل القسم ده بالأسباب الطبية البتخلي الشعر يخف من الجذر، ونعرف متين القزازة والمقشر والزيت لازم يقيفوا، ويبدأ التشخيص.
#حكاية_الشعر
#عيادات_بيت_العافية
#عيادة_الجلدية_أون_لاين