بعد ما صنفنا الزيوت في المنشور الفات لنافذة بتدخل جوه (زي جوز الهند) وخاتمة بتقعد بره (زي الخروع والجوجوبا)، بجي السؤال العملي: أختار ياتو زيت لشعري أنا تحديداً؟
عشان نلغي الحيرة والتجارب العشوائية، اختيار الزيت بيعتمد على تقاطع تلاتة عوامل: سُمك شعرتك (رفيعة ولا خشنة)، مساميتها /حالتها، وطبيعة المناخ حولك، الإجابة ما في اسم زيت سحري واحد، شوفي الخريطة دي:
١-حسب سُمك الشعرة:
- الشعر الرفيع أو قليل الكثافة: شعرتك ما بتتحمل الأوزان، الزيوت الثقيلة (الخروع، الزيتون، الكركار الدسم) حتلزق الخصل في بعضها وتوقعها على الفروة، فيظهر شعرك أخف من حقيقتو، خيارك هو الزيوت الخاتمة الخفيفة (جوجوبا، أركان، لوز حلو)، أو نقطة واحدة من زيت السمسم، والتكنيك هو "اللمسة": نقطتين في كف يدك، تفركيهم كويس، وتمسحي بيهم أطراف الشعر كأنك بتختي أثر زيت، لا طبقة زيت
- الشعر السميك، الخشن، شديد التجعيد: شعرتك بتحب الختم القوي لأنها بتفقد الموية بسرعة ومساحة الاحتكاك فيها عالية، خيارك هو الزيوت الخاتمة الثقيلة أو شبه النافذة (خروع، زيتون، مسحة كركار، أو زيت معدني/فازلين للأطراف فقط) عشان تحرس الترطيب لأطول فترة
٢-حسب مسامية وحالة الأطراف:
- عالي المسامية (متضرر، مصبوغ، مفرود): حراشف الكيوتيكل مفتوحة، بتشرب الترطيب وتفقده فوراً، محتاجة ختم مضاعف بزيوت أثقل على الأطراف لسد الفراغات وتقليل التكسر الميكانيكي
- منخفض المسامية: الكيوتيكل مقفولة والمنتجات بتقعد فوق السطح، لو ختيتي زيوت ثقيلة حتتراكم فوراً وتعمل تراكمات، خيارك هو زيوت خفيفة جداً (أرغان أو لوز) وتتخت على شعر مندي، موش فوق طبقة منتجات قديمة
- الشعر المتعب من الغسيل القاسي: خيارك المفضل هو زيت جوز الهند كحماية مسبقة (Pre-poo) قبل الدش، عشان يدخل العمق ويمنع انتفاخ الشعرة الزائد بالموية
٣-حسب المناخ وبيئة السودان:
- أيام الصيف الجافة والحارة: الهواء الناشف بشفط الموية من شعرك، هنا الختم بالزيت ضرورة مطلقة بعد خطوة الترطيب المائي (LCO أو LOC) عشان تعملي درع يمنع التبخر
- أيام الهبوب والغبار: الزيت الثقيل بتحول لـ "مغناطيس" بلم التراب الدقيق ويعمل طبقة طينية على الشعرة، في الأيام دي، خففي الزيوت تماماً واكتفي بليف-إن مائي ونقطة زيت خفيف جداً على الأطراف بس
قاعدة ذهبية: لو بتلبسي طرحة ساعات طويلة في الحر، أو فروتك بتعمل قشرة دهنية وحكة، أبعدي كل الزيوت عن الفروة والجذور تماماً، العرق والحرارة مع الزيت تحت الطرحة بعملوا كتمة وحكة والتهاب، والمالاسيزيا (فطر القشرة) بتتغذى على الزيوت دي وبتزيد، عالجي الأطراف في مكانها (آخر الشعر)، وما تنقلي مشكلتها لسطح الراس
باختصار: الشعر الرفيع بحب الخفيف، الخشن بحب الختم الأقوى، المتضرر بحتاج حماية مسبقة، والجو الناشف بتطلب عازل، لكن الهبوب عايز تخفيف، فالزيت الصاح هو البتخت في المكان الصاح، بالكمية الصاح، بعد الترطيب الصاح
في الحلقة الجاية حنفصل أكتر في النقطة دي: ليه تزييت الفروة ممكن يكون أكبر غلطة بتعمليها، ومتين الزيت بكون هو سبب القشرة بدل ما يكون حل ليها؟
#حكاية_الشعر #عيادات_بيت_العافية #عيادة_الجلدية_أون_لاين