ريحة العرق الكريهة (2 من 2)

التفاعل الكبير والتساؤلات الذكية في التعليقات على البوست الفات عن رائحة العرق، بتفتح لينا أبواب مهمة جداً لتصحيح مفاهيم شائعة، وأهمها السؤال المتكرر عن علاقة الشب أو مزيلات العرق بسرطان الثدي على المدى البعيد، وليه العالم مشيطن مضادات التعرق وأملاح الألومنيوم بالشكل ده، وهل ممكن نستخدمها عادي وباطمئنان.

القصة دي كلها بدأت كإشاعة قديمة في أواخر التسعينات، افترضت إن قفل قنوات العرق بيحبس "السموم" جوه الجسم فيخليها تترسب في الغدد الليمفاوية والجزء العلوي الخارجي من الثدي وتعمل أورام، أو إن الألومنيوم بيشتغل زي هرمون الإستروجين.

لكن لما نرجع للطب المبني على الدليل، بنلقى إن الجمعية الأمريكية للسرطان والمعهد الوطني للسرطان وعشرات الدراسات العلمية المحكمة نفت تماماً وجود أي علاقة سببية بين أملاح الألومنيوم في مضادات التعرق أو الشب وبين سرطان الثدي.

السبب العلمي لكون أغلب أورام الثدي بتظهر في الربع العلوي الخارجي قريب من الإبط هو ببساطة إن نسيج الثدي نفسه بيكون أكثف وأكبر في المنطقة دي تشريحياً، ما بسبب مزيل العرق، أضف لكده إن نسبة امتصاص الجلد للألومنيوم ضئيلة جداً وتكاد لا تُذكر.

وده بيقودنا للسؤال المنطقي التاني: هل قفل قنوات التعرق بصورة شبه مستمرة بياثر سلباً على الجسم؟ الحقيقة الفسيولوجية هي إن العرق وظيفته الأساسية تبريد الجسم مش طرد السموم؛ العضو المسؤول عن فلترة السموم وطردها هو الكبد والكلى، والعرق عبارة عن 99% موية وكمية بسيطة من الأملاح. غدد الإبط ما بتمثل غير أقل من 2% من إجمالي الغدد العرقية في الجسم، يعني قفلها الموضعي ما بيأثر على حرارة الجسم ولا بيحبس سموم، والسدادة اللي بيعملها الألومنيوم في القناة العرقية سطحية ومؤقتة وبتنزل براها مع تجدد خلايا الجلد خلال أيام. ومن هنا بنفهم ليه في الأسواق الغربية بنلقى منتجات مكتوب عليها حماية لمدة 3 أيام؛ الفكرة ما إن الزول ما يستحمى تلاتة يوم، لكن المنتجات دي مصممة بتراكيز علاجية أعلى لمرضى فرط التعرق بحيث إن السدادة الموضعية تفضل ثابتة جوه قناة العرق وما تدوب مع الاستحمام اليومي العادي، وإن كان طبعاً تركيزها الأعلى ده ممكن يعمل تهيج موضعي لو استُخدم بدون داعي طبي.

أما التحذير المكتوب في بعض العبوات لمرضى الفشل الكلوي باستشارة الطبيب، فده إجراء احترازي فرضته هيئة الغذاء والدواء الأمريكية (FDA) لأن المريض اللي كليته متوقفة تماماً ما بيقدر يتخلص من أي معادن حتى لو دخلت بكميات مجهرية عن طريق جروح صغيرة في الجلد بعد الحلاقة، لكن في الإنسان الطبيعي الكلى بتتخلص من أي أثر بسيط بكل سهولة.

نيجي للخلطات المنزلية والبدائل الطبيعية؛ استخدام الشب المطحون مباشرة فعلاً بيسبب التهاب واسمرار بسبب خشونة الحبيبات وتركيزه العالي، وبعض الناس بتحاول تلطفه بخلطه مع المسك أو إضافة زيت جوز الهند والنشا بكميات بسيطة.

علمياً، وجود زيت جوز الهند والنشا بيشتغل كطبقة مرطبة بتقلل الاحتكاك الميكانيكي لحبيبات الشب على الجلد، لكن بتفضل عندنا مشكلتين؛ الأولى إن تركيز الشب لسه عشوائي، والتانية والأخطر هي "المسك" والعطور الزيتية، لأن المواد العطرية في منطقة الإبط المقفولة هي المتهم الأول في إحداث التهاب الجلد التماسي التحسسي اللي بيقلب بمرور الوقت لتصبغ واسمرار عميق صعب العلاج.

ونفس التحذير ينطبق وبشدة على استعمال الليمون بعد الاستحمام والاعتقاد بإنه بديل طبيعي ومبيض للإبط؛ الليمون حمضيته عالية جداً (Citric acid)، صحيح الحموضة دي بتقتل البكتيريا مؤقتاً وتوقف الريحة لساعات، لكنها في المقابل بتعمل حرق كيميائي بطيء وتهيج لحاجز الجلد الرقيق في الإبط، ومع البشرة السمراء أي التهاب أو تهيج بيتحول فوراً لاسمرار عكسي عنيد بدل التبييض.

أخيراً، في ملاحظات دقيقة جداً ذكرتوها عن تغير طبيعة الريحة نفسها، زي إن رائحة العرق أحياناً بتكون شبيهة برائحة الكبريت، أو وجود حالة اسمها متلازمة رائحة السمك. ريحة الكبريت أو البصل الحادة بتحصل لما سلالات معينة من بكتيريا الـ (Corynebacterium) تشتغل على الأحماض الأمينية الغنية بالكبريت في عرق الغدد المفرزة وتحولها لمركبات كبريتية متطايرة اسمها (Thioalcohols)، أو نتيجة الإكثار من أكل أطعمة غنية بالكبريت زي التوم والبصل واللحوم الحمراء.

أما متلازمة رائحة السمك (Trimethylaminuria) فهي فعلاً حالة طبية حقيقية ونادرة ناتجة عن خلل جيني في إنزيم معين اسمه (FMO3)، بيخلي الجسم عاجز عن تكسير مادة "التراي ميثيل أمين" الناتجة من هضم أكلات زي السمك والبيض والبقوليات، فتخرج المادة دي في العرق والنفس بريحة تشبه السمك، ودي علاجها الأساسي بيكون بتنظيم الغذاء واستخدام غسولات طبية ذات حموضة معينة مش مجرد مزيلات عرق عادية.

الخلاصة إن مضادات التعرق الطبية آمنة ومفحوصة، والسر دايماً في اختيار المنتج المناسب لنوع بشرتك بعيداً عن فزع الإشاعات أو قسوة التجارب المنزلية.

⚕️ هذا المحتوى للتثقيف الصحي العام ولا يغني عن الاستشارة الطبية. لحالتك الخاصة يمكنك حجز استشارة بالعيادة.
استشارة عبر واتسابتابعنا على تلغرام