لو إنتي بتستعملي الكريمات دي بكمية كبيرة من شهور، أول قاعدة: ما توقفيها فجأة براك، نفس الإرشادات البتحدد استعمال الكلوبيتازول بتقول انو يتسحب بالتدريج، وده دور طبيب يقيّم حالتك ويرسم معاك خطة الانسحاب، والأحسن يكون قريب موش بعد شهور، ولو بعد التوقيف حسيتي بإرهاق غير عادي أو دوخة أو استفراغ أو إغماء، دي علامات محتاجة طوارئ طوالي، ما بتنتظر الصباح
والحامل البتستعمل الكريمات دي تقول لطبيبتها بالاسم، ويكون التوقيف تحت إشرافها، والأطفال، لا فروة ولا جلد، ولا من علبة مجهولة ولا من علبة معروفة، ولو فروتك بتحكك، أو شعرك بقع، أو خف، ففي سبب ورا ده، والكورتيزون بغطيهو ساي، أول خطوة هي التشخيص، موش علبة جديدة
وللزملاء الأطباء: السؤال عن كريمات التفتيح لازم يبقى جزء ثابت من الهستري، خصوصاً مع ضغط ما لقى ليهو سبب، أو سكري ما منضبط، أو ملامح كوشينغ، أو متلازمة كلوية، أو فطريات منتشرة وغريبة الشكل، أو تصبغ بزيد مع العلاج، الإجابة في كتير من المرات هي البتوصل للتشخيص الصحيح
والمشكلة في آخر الأمر ما علبة واحدة، المشكلة شبكة كاملة، فيها ضغط اجتماعي بربط الجمال باللون الفاتح، ومنتجات بتدخّل دواء بروشتة جوا علبة تجميل، وسوق فقد آخر عين كانت بتراقبو، ووسائل تواصل بتسوّق الخلطة قبل ما زول يسأل عن تركيبها، وصمت طويل بين الزبونة والدكتور، وكل خيط في الشبكة دي بشد التاني
الضغط بخلق الطلب، والطلب بفتح الباب للمهرّب، والمهرّب ما بسأل عن نسبة الكورتيزون، والزبونة ما بتحكي، والدكتور ما بسأل، عشان كده التحذير من ماركة بعينها ما بكفي، لأنو السوق حيطلّع بكرة علبة تانية بلون تاني واسم تاني وبنفس المحتوى
الحاجة البتصمد قدام الشبكة دي هي الفهم، الزولة الفاهمة الكورتيزون بعمل شنو في جلدها وفروتها وغدتها ما محتاجة قائمة أسماء عشان تشك في أي علبة بتوعدها بلون جديد في أسابيع
ونرجع للجزرة البدينا بيها، الجزرة المرسومة على العلبة هي أصدق حاجة فيها، لأنها بتكشف طريقة البيع: لغة الطبيعة والفيتامينات والتغذية، وجوا العلبة، في كتير من المرات، دواء بروشتة ما مكتوب، ومادة في بلدان تانية بتحترم مواطنيها ما بتسمح ببيعها إلا بروشتة