لمن الطفل يكبر شوية وبدخل المدرسة أو الخلوة أو يلعب في الحوش مع باقي الأطفال، جلدو بدخل مرحلة جديدة تماماً؛ مرحلة الاحتكاك والمشاركة والعدوى السريعة، وأشهر عدوى جلدية في المرحلة دي عند أطفالنا هي سعفة الرأس (Tinea capitis)، والناس بتسميها غالباً القرع أو قوباء الرأس
دي ما قشرة عادية وما حساسية، وإنما عدوى فطرية بتدخل جوا الشعرة نفسها، وده السبب البخليها منتشرة وصعبة لو اتعاملنا معاها بطريقة غلط، في السودان، سعفة الرأس من أكتر أمراض الجلد المعدية عند الأطفال، وفي بورتسودان لقت الدراسات انها في حوالي سبعة عشر بالمية (١٧٪) من أطفال المدارس، وفي بعض معسكرات النازحين والخلاوي ممكن تصل النسبة لأرقام أعلى بكتير، لحدي حوالي (٤٤،٦٪)، علشان كده فعلاً بنقدر نسميها وباء المدارس والخلاوي
الفطريات المسببة ليها كتيرة، لكن في اسم مهم شديد بالنسبة لينا: (Trichophyton soudanense)، فطر اسمو شايل اسم السودان، وده بوضح انو المرض ده ما مجرد معلومة في كتاب أجنبي، وإنما مشكلة من بيئتنا وبيوتنا ومدارسنا، وبرضو في أنواع من الـ (Microsporum) ممكن تسبب نفس الصورة
الصورة المعتادة انو الطفل يجي ببقع في فروة الراس فيها قشور وتساقط شعر، أحياناً البقعة بتكون دائرية أو غير منتظمة، والشعر فيها مكسّر وقصير، والجلد تحتها في البشرة الفاتحة ممكن يظهر أحمر، لكن في بشرة أطفالنا غالباً بظهر أغمق من الجلد المحيط أو رمادي أو عليه قشرة فقط، وده ممكن يخلي المرض بظهر أخف من حقيقتو
برضو عندنا نوع مهم اسمو سعفة النقط السوداء (Black dot tinea capitis)، هنا الشعرة بتتكسر عند سطح الفروة وبتخلي نقط صغيرة غامقة كأنها نقط حبر، ودي علامة قوية شديد، خصوصاً لو معاها قشور وحكة أو انتشار في أطفال تانيين في البيت أو المدرسة
ومهم شديد نفرقها من الثعلبة البقعية (Alopecia areata)، لأنو الثعلبة بتعمل فراغ شعر ناعم غالباً من غير قشور ومن غير التهاب ظاهر، بينما سعفة الراس بكون فيها قشور، شعر مكسّر، وأحياناً حكة أو غدد صغيرة ورا الرقبة، وبرضو نفرقها من صدفية فروة الراس ومن التهاب الجلد الدهني (Seborrheic dermatitis)، لأنو دي حالات ممكن تعمل قشرة لكنها ما بتكسر الشعر بنفس الطريقة
وأكبر غلطة في علاج سعفة الراس اننا نعتمد على كريم أو مرهم بس، لأنو الفطر موجود جوا الشعرة نفسها، والكريم ما بوصل للمكان ده كويس، العلاج الموضعي زي الشامبو المضاد للفطريات ممكن يقلل العدوى على سطح الراس ويقلل الانتشار، لكنو براهو ما بشفي المرض، الشفاء الحقيقي غالباً بحتاج مضاد فطريات بالفم بحددو الطبيب حسب عمر الطفل ووزنو ونوع الحالة والمتاح
العدوى بتنتقل بسهولة شديدة بمشاركة المشط، الطاقية، المخدة، الفوطة، أو حتى الاحتكاك القريب بين الأطفال، علشان كده لو طفل واحد في البيت عندو سعفة راس، لازم نفتش باقي الإخوة، ونوقف مشاركة الأمشاط والطواقي، وننظف الأدوات الشخصية، لأنو علاج طفل واحد وترك مصدر العدوى حوالينو بخلي القصة ترجع تاني
في الحلقة الجاية حنمشي للمشهد الأخطر في سعفة الراس: لمن المناعة تقرر تحارب الفطر بعنف، فتطلع كتلة مؤلمة ومتورمة ومليانة صديد على فروة الراس، وكتير بتتشخص غلط كأنها خراج وبتتفتح جراحياً، ودي غلطة ممكن تدمّر بصيلات الشعر وتسيب صلع دائم، دي حكاية الكيريون (Kerion)