الليلة عايزين نفتح سيرة موضوع ماف بيت فيهو طفل إلا ومر عليهو، وسبب قلق وسهر لكتير من الامهات، موضوع "التهاب الحفاض" أو "التسلخات"، الحكاية دي ما بسيطة زي ما الناس فاكرة إنها مجرد احمرار وبيروح، دي حالة جلدية بتعتبر من أكتر المشاكل المنتشرة وسط الأطفال في العالم كلو ، وبالنسبة للطفل دي حاجة مؤلمة شديد وبالنسبة للأم والاب هي سبب توتر دائم ومشي وجية على الدكاترة.
عشان نفهم الحاصل شنو، تخيلوا معاي منطقة الحفاض دي كأنها "منطقة استوائية" صغيرة ، جلد الطفل الرقيق ده أنعم وأرق بكتير من جلدنا نحن الكبار ، لمن نخت عليهو الحفاض بنكون عملنا زي "البيت الزجاجي" أو مناخ صناعي مقفول ، الحفاض بيمنع الجلد يتنفس وبيحبس الرطوبة جوه، والجلد لمن يتشبع بالمويه لفترة طويلة بيبقى "مهرود" وضعيف ، وهنا بتبدأ المشكلة الحقيقية، لأنو الجلد الضعيف ده بيبقى ساهل جداً يتجرح مع أي احتكاك بسيط بالحفاض أو حركة الطفل.
نحن في السودان ، الجو عندنا حار، وده بيزيد الطين بلة، وعشان كدة الدراسات في دول قريبة من مناخنا زي السعودية لقت إنو نسبة الإصابة ممكن تصل لـ 80% بين الأطفال ، يعني الحكاية ما نادرة ولا غريبة، والسبب الاساسي هو الحرارة العالية اللي بتزيد التعرق والرطوبة جوه الحفاض المقفول ده
والموضوع بيبقى كيمياء معقدة لمن البول "الله يكرمكم" يختلط مع البراز، والبكتيريا الموجودة طبيعيا هناك بتقلب اليوريا لأمونيا ، والأمونيا دي بتخلي الوسط "قلوي" بدل ما يكون حمضي زي طبيعة الجلد، والوسط القلوي ده هو اللي بيشغل انزيمات بتبدأ حرفياً تاكل في جلد الطفل وتهد الجدار الحامي حقه.
أهم حاجة عايزكم تعرفوها الليلة إنو التسلخات دي ما معناها إنو الأم مقصرة في النظافة، وإنما دي "فشل في وظيفة حاجز الجلد" حصل بسبب الظروف الصعبة والبيئة المقفولة دي ، وعشان كدة في السلسلة دي حنمسك الموضوع ده واحدة واحدة، حنعرف نفرق بين التسلخ العادي وبين الالتهابات الفطرية والبكتيرية وغيرها اللي بتشبهو، وحنعرف كيف نعالج صح ونبعد من العادات الغلط اللي ممكن تضر أطفالنا.
#عيادات_بيت_العافية #عيادة_الجلدية_أون_لاين