كتير من الأمهات بيجونا محبطات شديد ويقولوا لينا "يا دكتور التسلخ ده نعالجه من هنا يرجع لينا تاني من هنا"، أو تقول ليك "لينا أسبوع بندهن وماف فايدة"، الإحساس ده صعب لكن لازم نفهم إنو رجوع التسلخات ده أمر متوقع طالما الطفل لسه بيلبس حفاض، وبالذات لو الأسباب الأصلية لسه موجودة
يعني لو الشافع "بسنن" وعندو إسهال متكرر، أو لو وقفنا ندهن العازل "الزنك" بمجرد ما الجلد راق، التسلخ حيرجع طوالي لأنو خط الدفاع الأول اختفى ، وهنا عندنا قاعدة ذهبية بنقولها لكل أم وهي "قاعدة التلاتة أيام"، لو بتطبقي نظام التهوية والعازل والنظافة صح وماف أي تحسن بعد 3 أيام، يبقى لازم نوقف ونعيد الحسابات، لأن الاستمرار في نفس الحاجة الغلط ما حيجيب نتيجة.
في اللحظة دي لازم نفكر خارج الصندوق، احتمال كبير يكون السبب "حساسية" من حاجة نحنا ما منتبهين ليها، ممكن يكون نوع المناديل المبللة الجديد فيهو مواد حافظة الطفل بتحسس منها، أو حتى نوع الحفاضة نفسها، وأحياناً بكون الكريم ذاتو فيهو مادة زي "اللانولين" جلد الطفل ما قابلها
وهنا بيجي دور "التدخل الكيميائي" أو الأدوية الحقيقية، ولازم نفرز الكيمان، لو الموضوع فطريات زي ما شرحنا قبل كدة (اللون الأحمر الغامق والحبوب المطرفة) لازم نستخدم كريمات مضادة للفطريات زي "النيستاتين" أو عائلة "الازول" عشان تقضي عليها
أما لو لقينا صديد أو قشرة عسلية وبكتيريا فالحل بيكون في مراهم المضاد الحيوي زي "الميوبيروسين" ، وفي حالات نادرة لما الالتهاب يكون حارق وشديد وما مستجيب، الدكتور ممكن يكتب كورتيزون "خفيف جداً" زي الهيدروكورتيزون 1% لفترة قصيرة عشان يهدي النار، وده لازم يكون بحذر شديد وما يتاخد من راسنا
فلو التسلخ طول وعصلج معاكم، ما تيأسوا وتجربوا وصفات عشوائية، فتشوا عن السبب الخفي واستشيروا الطبيب عشان يحدد السلاح المناسب للمعركة.
#عيادات_بيت_العافية #عيادة_الجلدية_أون_لاين