اللشمانيا الجلدية ما نوع واحد، ولا حبة واحدة، هي عائلة من المشاكل، وبتتصرف حسب "الفصيلة" البتسببها. يعني تشخيصها في السودان مُركب، تماماً زي جغرافيتنا.
في الأساس، عندنا نوعين رئيسيين بيسببوا "الحبوب" و"التقرحات" دي:
1. النوع الرطب (L. major): ده سريع ومستعجل زي زول زعلان، بيعمل قرحة سريعة وكبيرة وملتهبة (عشان كدا سموها رطبة) وبتاخد ليها كم شهر وبتختفي. ده هو النوع المنتشر حالياً في بؤر النزوح والأطراف الزراعية.
2. النوع الجاف (L. tropica): ده نوع بطيء، بيقعد شهور وسنين، وحبتو صغيرة وشكلها بيخدع، وغالباً ما بتتحول لقرحة كبيرة بسهولة.
3. النوع المخادع (L. donovani): الأغرب من ديل كلهم هو إنو في السودان ممكن نفس الطفيلي اللي بيعمل "الكالا-آزار" (اللشمانيا الحشوية القاتلة) يعمل لينا قرحة جلدية بس، وده بيوريك تعقيد بيئتنا الصحية.
الخطر ما في شكل الحبة الأول؛ المشكلة في طريقة تطورها. القصة بتبدأ بـ"حبة" أو "عقدة" صغيرة حمراء، بتكبر ببطء، وفي الغالب ما بتوجع. ودا هو الفخ!
الناس بتفتكرها قرصة بعوضة عادية أو خراج بسيط وبتهملها. بعد أسابيع أو شهور، الحبة دي بتفتح وبتبقى قرحة. والقرحة دي عندها شكل مميز:
• الحواف المرتفعة: الحافة بتكون عاملة زي "السبحة" المليانة، ودا لأنها مليانة طفيليات بتتربى فيها.
• القعر الغاير: مركز القرحة بيكون غاطس للأسفل، ومغطى بقشرة صفراء، وده اللي خلاها تاخد اسم "فوهة البركان".
• عدم الإحساس بالألم: ودي أهم علامة تفرزها عن الخراجات البكتيرية العادية اللي بتخلي الزول يحس بالوجع. لكن للأسف ممكن قرحة اللشمانيا تلتهب بكتيريا وتعقد عملية التشخيص
وطبعا ما بنقدر نتكلم عن اللشمانيا في السودان من غير ما نذكر "PKDL" (أو التحول الجلدي المتأخر). دي بتكون عبارة عن بقع أو حُبيبات صغيرة بتظهر على الجلد بعد شهور أو سنين من علاج الكالا-آزار (اللشمانيا الحشوية – يعني البتصيب الأعضاء الداخلية). والحالات دي خطيرة لأنو المريض بيكون حامل للطفيلي وناشر للعدوى، وبتشتغل كمستودع صامت للمرض في وسط المجتمع، وهنا بيكمن الخطر في أزمة الحرب: كل مصاب بالكالا-آزار يتعالج لازم نفحصو بعد فترة عشان نتأكد إنو ما تحول "جلدي".
الخطر الأكبر في اللشمانيا الجلدية ما في الوفاة، لكن في التشوهات اللي بتخليها وراها، خصوصاً لو كانت في الوجه، أو الأنف، أو حول العينين. تركها بدون علاج ممكن يتسبب في "فقدان أنسجة" أو "تضخم" ما بتصلح إلا بعمليات تجميل معقدة، وده شي صعب جداً في ظروفنا الحالية.
عشان كدا، لو عندك حبة قعدت معاك أكتر من شهر، وما بتوجع، وحوافها مرتفعة، لازم تشك فوراً. لكن ما كل قرحة في جلدنا هي لشمانيا! ودي نقطة مهمة جداً خصوصاً في زمن قلت فيهو المعامل.
في البوست الجاي حنعمل "جلسة محقق" سريعة.. حنستعرض فيها الأمراض التانية اللي ممكن تتشابه مع اللشمانيا لحد الغش، وحنوريكم العلامات الذهبية اللي بتخليك تفرق بين "فوهة البركان" وبين "قرحة الرجل الوريدية" أو "المايستوما" أو أي "ورم لمفاوي" تاني.
ربنا يغطي عليكم ويجعلها سلامة.
#عيادة_الجلدية_أون_لاين
#عيادات_بيت_العافية
ملحوظة:
الصور دي لحالات حديثة من الخرطوم