وصلنا لآخر محطة في مشوارنا الطويل ده، وبعد ما اتعلمنا كيف نحمي "جلودنا" بالزيت والملابس، لازم نعرف كيف نحمي "بيوتنا" ومكان نومنا، لأنو ببساطة لو نظفت جسمك ونمت وسط "مستعمرة" ذباب فالمعركة حتكون خاسرة، والبيئة اللي نحنا بنشوفها "دمار ووسخ" هي بتشوفها "فندق 5 نجوم" عشان تبيض وتفقس فيه.
عشان كدا الوقاية الحقيقية بتبدأ من "المكنسة والمسطرينه"، فالحرب خلت حيط كتيرة مشققة ومباني مهدودة، والشقوق دي والركام المظلم الرطب هو "غرفة النوم" المفضلة للذبابة بالنهار، وعشان كدا أي شقوق في حيطة الغرفة اللي بتنوم فيها لازم تتقفل بطين أو جبص أو بأي شي متاح، وأي ركام أو طوب مكسور جنب مكان نومك لازم يتبعد بعيد، فما ينفع تنوم وجنب راسك كومة أنقاض لأنك كدا بتكون عزمت الذبابة عشا.
وكمان لازم ننتبه لموضوع الزبالة وروث البهائم، لأن الذبابة دي ما بتبيض في الرمل الناشف بس، يرقاتها بتموت في "الوسخ العضوي" زي روث البهائم وزبالة الأكل والتربة المبلولة الوسخانة، فما ترموا الزبالة جنب البيت ولازم تتجمع وتتحرق أو تتدفن بعيد، وزرائب البهائم لازم تكون بعيدة من مكان نوم البشر قدر الإمكان لأن نظافة الأرضية حول مكان النوم هي أهم خطوة لقطع دابر التكاثر.
والناس اللي نزحت للمناطق الزراعية والغابات لازم ينتبهوا لجحور الفئران والجقور لأنها هي "المخزن" الرئيسي للذبابة والمدخل للمرض، فحاولوا تكافحوا جحور القوارض القريبة منكم، وكمان شجر السنط والطلح والهجليج اللي بتعتبر بيئة الذبابة الناقلة للكالا-آزار حاولوا ما تنوموا تحتها مباشرة، ولو مضطرين فلازم تدخنوا المكان ببخور النيم أو الطلح قبل النوم لطرد الحشرات.
والأهم من ده كله إنو الذبابة دي ما بتعرف حدود بيتك، ولو أنت نظفت وجارك خلى الزبالة فالذبابة حتجيكم الاتنين، وعشان كدا الوقاية من اللشمانيا في المعسكرات والقرى لازم تكون "عمل جماعي" ونفير حقيقي، يعني شباب الحي ولجان المقاومة وشيوخ المعسكرات لازم ينظموا حملات نظافة جماعية لإزالة الأنقاض والنفايات وردم البرك والجحور، ودي الطريقة الوحيدة اللي بنقدر بيها نقلل كثافة الذبابة ونكسر حدة الوباء.
وختاماً، السلسلة دي كانت محاولة لجمع "شتات الطب" و"حكمة الأجداد" و"واقع الحرب" في روشتة واحدة عملية ليكم، فاللشمانيا مرض "سغيل" وتقيل لكنه في النهاية "ضعيف" أمام الوعي والنظافة والتكاتف، وقرحة الجلد بتبرى وتخلي أثر لكن الوجع الحقيقي هو أثر الحرب في نفوسنا وده برضه حيبرى بإذن الله لما نرجع نعمرها وننظفها سوا، وتمنياتي ليكم بصحة وعافية وربنا يغطي على السودان وأهله ويرفع الغمة ويردنا لبيوتنا سالمين غانمين.
#عيادة_الجلدية_أون_لاين
#عيادات_بيت_العافية