"الوقاية خير من العلاج"، والكلمة دي بالذات في زمن الحرب وشح الدواء ما بقت مجرد مثل قديم، دي بقت استراتيجية بقاء، وعشان تحمي نفسك وأولادك، لازم أول حاجة تعرف "العدو" اللي بتحاربه ده شكله شنو؟ وبيجي من وين؟ لأنو اللشمانيا دي ما بتنزل من السماء، دي بتجي عبر "وسيط" خبيث جداً ومعه "شريك" بيخزن ليهو المرض.
أول معلومة لازم نصلحها، وهي الغلطة اللي بيقع فيها أغلب الناس، إنهم فاكرين الناقل ده "ناموسة" أو "بعوضة"، والحقيقة إنو العدو بتاعنا ده كائن مختلف تماماً واسمه "ذبابة الرمل" (Sandfly) ، والفرق بينها وبين البعوضة زي الفرق بين الحرامي المحترف والنشال؛ البعوضة بتسمع "زنتها" وبتشوفها وهي طايرة
لكن ذبابة الرمل دي بنسميها "الشيطان الأخرس"، كائن صغير جداً (تلت حجم البعوضة) ما بتسمع ليها أي صوت ولا طنين، ولونها أصفر ترابي بيخليها تختفي مع لون الأرض والحيط. وكمان حركتها غريبة، هي ما "بتطير" زي البعوض، وإنما "بتنط" بقفزات قصيرة، وما بترتفع عن الواطه كتير،
وعشان كدا غالباً بتلدغ الناس في رجليهم أو يدينهم وهم نايمين قراب من الأرض. الذبابة دي عندها أوقات "دوام" محددة، بتنشط جداً وقت الغروب (المغارب) ووقت الشروق (الفجر)، وباقي اليوم بتلبد في الشقوق المظلمة والرطبة.
وهنا بتجي علاقة الحرب بالمرض؛ الذبابة دي بتعشق "الأنقاض"، يعني المباني المهدمة، والحيط المشققة، وتراكمات الطوب والزبالة، دي كلها بالنسبة ليها "فنادق 5 نجوم" بتسكن وتتكاثر فيها ، وعشان كدا الدمار اللي حصل في المدن خلى البيئة مثالية ليها عشان تعيش وسطنا.
أما "شريك الجريمة" فهو الحيوان اللي بيحتفظ بالمرض عشان الذبابة تشيله منه وتديهو ليك، وبالنسبة للشمانيا الجلدية في السودان، المتهم الأول هو "الفأر النيلي" (Nile Rat) أو اللي بنسميهو "الجقر" أو الفيران البرية اللي بتعيش في المزارع والحواشات.
الفأر ده دمه بيكون مليان طفيليات، والذبابة لما تقرصه بتاخد العدوى وتجي تفرغها في دم الإنسان. المشكلة الحقيقية إنو بسبب الحرب، ملايين الناس نزحوا من بيوتهم وسكنوا في "المزارع" وأطراف القرى، يعني مشوا برجليهم وسكنوا في "عقر دار" الفأر والذبابة ، وده اللي خلى الاحتكاك مباشر والعدوى سريعة جداً.
في البوست الجاي حنتكلم عن "الدرع الشخصي".. كيف تحمي نفسك وأولادك من اللدغات دي وأنت نايم في العراء أو في بيت إيجار ما مجهز؟ وهل الناموسيات العادية بتنفع ولا هي "غربال" بيدخل الذبابة؟
حفظكم الله وكفاكم شر الأوبئة.
#عيادة_الجلدية_أون_لاين #عيادات_بيت_العافية