واحد من أكثر المواضيع اللي بتعمل تشويش للمرضى في عياداتنا هي "لغز الجرعة والمدة"، لإنو المريض ممكن يستغرب جداً لما الدكتور يطلب منو ياخد حبوب الحديد بنظام الـ Alternate-day dosing أو "يوم بعد يوم" بدلاً من النظام اليومي المعتاد
والحكاية دي ما مجرد "موضة" طبية جديدة، إنما هي تطبيق عملي لفهمنا الحديث لفسيولوجيا هرمون بيفرزه الكبد اسمو Hepcidin، والهرمون ده ببساطة هو "البواب" أو الـ Regulator الرئيسي لامتصاص الحديد في الجسم، والدراسات الحديثة أثبتت إننا لما ناخد جرعة علاجية من الحديد، مستوى الـ Hepcidin ده بيرتفع تلقائياً في الدم وبيعمل ما يشبه "الإغلاق المؤقت" أو الـ Blockade لمستقبلات الامتصاص في الأمعاء لمدة ممكن تصل لـ 24 ساعة.
بناءً على الفهم ده، اتضح إننا لو أخدنا الحديد يومياً، الجرعة الثانية حتصل للأمعاء وتلقى "الباب مقفول" بفعل تأثير الجرعة الأولى، فالحديد كده ما بيمتص وحيفضل "راقد" في الجهاز الهضمي يسبب الالتهابات والمغص والإمساك
وعشان كدة استراتيجية الجرعة "يوم بعد يوم" بتدي فرصة لمستويات الهبسيدين إنها ترجع للطبيعي، فبنضمن إنو كل جرعة تدخل الجسم تلقى امتصاص عالي (Higher Fractional Absorption) وآثار جانبية أقل بكتير، وده السيناريو الأمثل لأغلب الحالات
إلا طبعاً في حالات الـ Severe Anemia لما يكون الهيموجلوبين واقع شديد (أقل من 8) أو في حالات الحمل المتأخر، هنا بنضطر نستخدم النظام اليومي لأننا بنكون في سباق مع الزمن ومحتاجين نضخ أكبر "كمية كلية" من الحديد للجسم حتى لو كانت كفاءة الامتصاص أقل.
عموما بأي طريقة ناخدو فلازم نعرف نواصل لبتين؟
في البوست الجاي حنعرف بالضبط نقدر زمن العلاج كيف
#عيادات_بيت_العافية
#عيادة_الجلدية_أون_لاين