من أكثر السيناريوهات اللي بتسبب إحباط للمريض وللطبيب المعالج هي استعجال النتائج والذهاب للمعمل في التوقيت الغلط، لأنو المريض بعد ما يبدأ العلاج بأسبوع أو عشرة أيام بيحس بإنو عايز يطمئن فبيمشي يعيد الفحوصات، وهنا بتحصل صدمة إنو الأرقام لسه زي ما هي
لكن ده طبيعي جداً لأنو مصنع نخاع العظم أو الـ Bone Marrow بيحتاج وقت عشان يستجيب للحديد الجديد ويبدأ عملية الـ Erythropoiesis أو تصنيع كريات الدم الحمراء، وعشان كدة القاعدة الذهبية في المتابعة بتقول إننا ما بنعيد فحص الـ Hb إلا بعد مرور 4 أسابيع كاملة من الانتظام على العلاج، وفي التوقيت ده بالذات بنكون متوقعين زيادة في الهيموجلوبين بمقدار 1 جرام/ديسيلتر على الأقل، ودي العلامة اللي بتأكد لينا إننا ماشين في الطريق الصحيح وإنو التشخيص كان سليم والامتصاص شغال بكفاءة.
أما الفخ الكبير اللي بيقع فيهو ناس كتيرة فهو إعادة فحص المخزون أو الـ Serum Ferritin في نفس الوقت مع الهيموجلوبين، ودي خسارة قروش ومجهود ساكت، لأنو زي ما قلنا الجسم بيصلح الدم الجاري أولاً وبعدين بيبدأ يلتفت للمخازن، فارتفاع الفريتين بيحتاج شهور
ده غير إنو الفريتين ده بروتين "مكار" جداً طبياً بنسميه Acute Phase Reactant، يعني هو بيرتفع تلقائياً وبصورة "كاذبة" في حالات الالتهابات والحميات وأي نشاط مناعي في الجسم، فممكن المريض يكون عندو التهاب بسيط أو ملاريا ويمشي يفحص يلقى الفريتين مرتفع فيفتكر إنو اتعالج ويوقف الحديد، بينما هو في الحقيقة لسه بيعاني من فقر دم حاد، وعشان كدة نحن كأطباء ما بنعتمد على قراءة الفريتين لو كان المريض بيشتكي من أي أعراض التهابية نشطة.
في حالة إننا فحصنا بعد شهر ولقينا الـهيموجلوبين Hb ما زاد الزيادة المتوقعة رغم إنو المريض ملتزم بالعلاج، هنا لازم نخت خطين حمر ونقيف عشان نراجع الحسابات، لأنو ده بيعني غالباً إنو في مشكلة في الامتصاص Malabsorption زي وجود جرثومة معدة أو حساسية قمح غير مكتشفة، أو إنو في Ongoing Blood Loss يعني نزيف مستمر نحن ما انتبهنا ليهو
وفي الحالات الزي دي، أو لو كان المريض ما قادر يتحمل الآثار الجانبية لزيادة الحبوب خالص، بنلجأ فوراً للخيار البديل والأسرع وهو الحديد الوريدي أو الـ Parenteral Iron، وده تطور جداً في السنوات الأخيرة وبقى آمن وفعال وبيرفع الحديد في جلسات بسيطة
ده بيقودنا لأهم نقطة ختامية وهي كيف نساعد جسمنا بالأكل والعادات الصحيحة عشان نحسن الامتصاص ده لأقصى درجة، وده موضوع بوستنا الجاي والأخير.
#عيادات_بيت_العافية
#عيادة_الجلدية_أون_لاين