عبر سنوات خبرتي بالطب اتكونت عندي قناعة، فكرة بسيطة في ظاهرها لكن معقدة في معناها: انو في الطب، نحن ما بنعالج المرض، وإنما بنعالج الزول الحامل المرض ده!
لما تلقى مرض واحد وعلاجات كتيرة معتمدة، دي ما علامة ارتباك في العلم، دي اعتراف صريح إنو المرض مفهوم نظري، لكن المريض حقيقة متحركة.
أي زول ما هو مجرد تشخيص: عنده عمر، وظروف، وأمراض تانية، وتجارب سابقة، وخوف، وتوقعات، وقدرة مختلفة على التحمل والالتزام. العلاج البكون ممتاز في دراسة كبيرة، ممكن يكون اختيار سيئ في زول قاعد قدامك في العيادة.
عشان كده السؤال الصاح ما: “شنو أفضل علاج للمرض ده؟”، السؤال الصاح: “شنو أنسب مدخل علاجي للزول ده، في الزمن ده، بالظروف دي؟”
الفرق بين السؤالين هو الفرق بين الطب كحفظ، والطب كتفكير. الخبرة السريرية الحقيقية ما هي إنك تكرر نفس الوصفة لأنها اشتغلت قبل كده، بل إنك تعرف متين ما حتشتغل. وإنك توسّع خبرتك بتجارب غيرك، بدراسات الحالات، وبالمراجعات المنهجية، عشان ما تكون سجين تجربتك الشخصية بس.
أكتر سوء فهم بشوفو، حتى بين أطباء، إنو التشخيص هو سدرة المنتهى، آخر محطة للتفكير، بعدها بتكتب العلاج المعروف ليهو. بينما الواقع إنو التشخيص مجرد لافتة طريق. بعدها بتيجي المرحلة الأصعب: التخطيط، الموازنة، التقدير، وتحمل مسؤولية القرار.
في النهاية، الطب ما فعل ميكانيكي، وما سلسلة خطوات محفوظة. هو فعل إنساني قائم على التقدير، وعلى الاعتراف إنو ما في “أفضل علاج” مطلق، في “أنسب علاج” لزول محدد.
لما الفكرة دي تستقر في وعي الطبيب والمريض مع بعض، ساعتها العلاقة العلاجية كلها بتتغير، وساعتها العلاج بطلع من كونو إجراء آلي إلى كونو فهم إنساني حكيم.
#عيادات_بيت_العافية
#عيادة_الجلدية_أون_لاين