لازم نفهم إنو الجلد ما "سفنجة" بتشرب أي حاجة نكبها فوقها، ده خط دفاع صلب مصمم عشان يمنع دخول الأجسام الغريبة، والكبسولات دي جزيئاتها مصممة بحجم معين عشان تتهضم وتمتصها الأمعاء بعد ما تتبلع، ما عشان تخترق طبقات الجلد المعقدة، فبالتالي بتقعد "بخمول" بس في الطبقة السطحية وما بتوصل نهائي لمنطقة "الأدمة" اللي هي محل الشغل الحقيقي ومكان الكولاجين.
وفوق ده كلو، الفيتامينات دي في طبيعتها مواد "حساسة" شديد، وبمجرد ما تفتحي الكبسولة وتخلطيها في الهواء وتتعرض للضوء بتبدأ تتأكسد وتفقد مفعولها تماماً قبل ما تلمس وشك ذاتو، غير إنك بالحركة دي برضو بتخربي التوازن الكيميائي ودرجة الحموضة المعينة بتاعة كريمك المرطب وممكن تتسببي في تعفن أو نمو بكتيريا جوة العلبة وانتي ما شايفة.
الحقيقة إننا بنحتاج مضادات الأكسدة عشان تحارب "الشوارد الحرة" الناتجة من الشمس والتلوث اللي بتدمر الكولاجين وبتعجز بالجلد، والشغل ده لازم يتم جوة في الأعماق، لكن الكبسولات المفرغة دي بتمسح السطح بس وغالباً بتقفل المسام وتطلع ليك حبوب لاحقا، يعني بدل الفايدة بتجيب ليك البلاوي.
لو فعلاً عايزة فائدة حقيقية وموضعية، البديل الصح والآمن هو "السيروم" الطبي المتخصص، لأنو بكون مركب كيميائياً بجزيئات دقيقة جداً ومواد حمالة مهيأة إنها تخترق مسام الجلد وتوصل للأدمة وهي لسة محافظة على فعاليتها.
والسر الحقيقي اللي لازم كل بنت تعرفه هو إنو حتى أغلى سيروم في العالم ما حيشتغل براهو، لأنو صحة جلدك ونضارته هي انعكاس مباشر لسستم حياتك، فمهما دهنتي من برة وما اهتميتي بنومك الكافي بالليل - اللي هو الوقت الجلد بيعمل فيه صيانة لنفسه وببني الكولاجين - وشك حيفضل باهت، ومهما حاولتي تعالجي الحبوب وانتي بتاكلي سكريات وزيوت مهدرجة بتعمل التهابات صامتة وبتهدم خلايا البشرة يبقى كأنك بتبني في بحر، ده غير إنو التوتر والقلق الدائم برفعوا هرمون الكورتيزول اللي بيمحي نضارة الوجة تماماً
عشان كدة الترطيب الحقيقي ببدأ من شرب الموية والتغذية المتوازنة وراحة البال، وقتها بس العلاجات الموضعية بتلقى بيئة صحية تشتغل فيها وتديك النتيجة السمحة اللي بتفتشي عليها.
#عيادات_بيت_العافية
#عيادة_الجلدية_أون_لاين