أكتر حاجة لفتت نظري إنو الجلد كان ناعم تماماً، وما في أي إحساس غريب، والبقع في الصدر كانت مركزة في النص، وفي الوجه ظاهرة بشكل متناظر. قال جرب علاجات فطريات كتيرة وما نفعت، ودا خلاني أفكر في مرض اسمو نقص التصبغ البقعي التدريجي.
المرض دا بيختلف عن البهاق، اللي بكون عادةً أبيض شديد وحدوده واضحة زي الخط، وأحياناً الشعر فيهو ببقى أبيض. هنا اللون بس أفتح من الجلد الطبيعي، وحدوده أخف، وما في بياض طباشيري. كمان ما عندو علاقة بمناعة أو أمراض خطيرة.
السبب الغالب للمرض دا مرتبط ببكتيريا حب الشباب الموجودة طبيعياً في الجلد، خاصة في مناطق دهنية زي منتصف الصدر والوجه. البكتيريا دي بتأثر على شغل الخلايا الصبغية وبتخلي اللون يخف بدون ما الجلد يتأذى.
العلاج البينفع غالباً بيكون بعلاجات حب الشباب الموضعية زي غسولات فيها بنزويل بيروكسيد أو مضادات بكتيريا موضعية، ومعاها العلاج الضوئي بالأشعة فوق البنفسجية الضيقة، البترجع تنشط الخلايا الصبغية شوية شوية.
رغم إنو المرض شكله مزعج لكنو حميد، والمهم إنو المريض يرتاح ويفهم إنو ما بهاق ولا مرض مزمن مخيف.
#عيادات_بيت_العافية
#عيادة_الجلدية_أون_لاين
ملحوظة:
الصورة من مجلة طبية