في مرات تجي العيادة مريضة شاكية من مشكلة بسيطة في ظاهرها، تقول: عندي طفح في الحلمة، لما تعاين تلقى الجلد حول الحلمة محمر شوية، في قشور خفيفة، وأحياناً إفراز بسيط، أول انطباع غالباً يكون إنو دي أكزيما أو تحسس جلدي في المنطقة الحساسة دي.
لكن في حالات قليلة القصة ما بتكون تحسس جلدي عادي، بل ممكن يكون مرض اسمه داء باجيت في الحلمة Paget’s disease of the nipple.
المرض دا نوع من الأمراض السرطانية المرتبطة بسرطان الثدي، لكنه يظهر في البداية في جلد الحلمة نفسها، يبدأ غالباً في جهة واحدة فقط، ويظهر في شكل احمرار مع قشور وحكة خفيفة، لذلك بسهولة ممكن يتفسر كأكزيما.
الفرق المهم إن الأكزيما العادية في المنطقة دي غالباً بتكون في الجهتين مع بعض، بينما مرض باجيت غالباً ببدأ في حلمة واحدة فقط، ويظل في نفس المكان لفترة طويلة بدون ما يختفي تماماً رغم العلاج.
المرض دا نادر مقارنة بالأكزيما العادية، لكن الفكرة المهمة هنا إن في أعراض جلدية بسيطة أحياناً تكون هي أول إشارة لمشكلة أعمق، عشان كده أي التهاب مزمن في الحلمة، خاصة لو كان في جهة واحدة وما استجاب للعلاج المعتاد، يستحق تقييم أدق وفحصاً كاملاً للثدي.
الجلد مرات بكون أول من يلفت الانتباه لما يكون في شيء غير طبيعي تحت السطح.