في مرات الزول يجيك العيادة شاكي من بقعة ليها زمن، فيها حكة خفيفة، ولونها أغمق شوية من الجلد، ومعاها قشور بسيطة، لما تعاينها أول مرة ممكن تقول بسهولة: دي شكلها أكزيما.
يتكتب كريم كورتيزون ومرطب، وبعد فترة المريض يقول فعلاً هدأت. لكن المشكلة إنها ما بتختفي تماماً. تهدأ شوية وترجع تاني. تظل في نفس المكان سنين، أحياناً في الفخذين أو الأرداف أو أسفل الظهر. والمريض يظل يتنقل بين كريم وكريم، وكل مرة يسمع نفس التفسير: أكزيما مزمنة.
النوع دا من القصة مرات بكون مجرد أكزيما مزمنة فعلاً، لكن في حالات قليلة جداً ممكن يكون شيء مختلف تماماً، مرض اسمه الفُطار الفُطْرانيMycosis Fungoides.
الاسم قديم ومضلل شوية، لأنه ما فطريات زي ما ممكن يتخيل الزول من الاسم، ففي الحقيقة هو نوع من أمراض الغدد اللمفاوية اللي بتظهر في الجلد، يعني نوع من سرطانات الجلد اللمفاوية.
الغريب في المرض دا إنه ممكن يقضي سنوات طويلة جداً في شكل بقع تشبه الأكزيما، بقع مسطحة، فيها قشور خفيفة، وتسبب حكة بسيطة، عشان كدا كثير من المرضى بتعالجوا لسنين على أساس إنها أكزيما أو فطريات قبل ما يتضح التشخيص الحقيقي.
المرض دا نادر مقارنة بالأكزيما العادية، لكن الرسالة البسيطة هي إن في بقع جلدية تستحق شوية انتباه إضافي: أي بقعة قعدت في نفس المكان سنين، ما اختفت تماماً، وبترجع كل مرة بعد العلاج، دي مرات بتكون محتاجة نظرة ثانية