مرات المشكلة في الجلد ما بتكون بكتيريا ولا فطريات ولا حتى سكري، مرات المشكلة بتكون "سباكة" بحتة.
تخيل معاي إنو جسمك ده فيهو شبكة مواسير دقيقة جداً بتشيل الدم والموية، وعندك مضخة رئيسية هي القلب، وفلاتر بتنظف هي الكلى والكبد، لما يحصل هبوط أو فشل حاد في واحد من الأعضاء دي، زي تفاقم الفشل القلبي أو الكلوي أو تليف الكبد، الموية دي بتتراكم في الجسم وتحديداً بتنزل تتجمع في الكرعين والساقين، وبتظهر أكتر حاجة عند كبار السن والناس الملازمين للسرير وحركتهم قليلة.
هنا بيحصل احتباس للسوائل وتورم شديد، ولما نظام التصريف بتاع الجسم (الجهاز اللمفاوي) يعجز عن سحب الموية الزايدة دي بالسرعة المطلوبة، الضغط جوة الأنسجة بيزيد شديد جداً، الضغط العالي ده بيبدأ يدفتر طبقة الجلد الخارجية ويفصلها من الطبقة التحتية بالقوة الميكانيكية البحتة، زي الرطوبة لما تنفخ بوهية الحيطة وتخليها تقب لبره.
النتيجة بتكون ظهور بقاقات كبيرة ومشدودة مليانة موية صافية ومعقمة، من غير أي حمار أو التهاب حوالينها.
الحالة دي طبياً بنسميها (Edema Bullae) أو بقاقات التورم، وعشان كده علاج الحالة دي ما عنده أي علاقة بكريمات الكورتيزون أو أدوية المناعة، الحل ببساطة هو إننا نعالج السبب الأساسي في المستشفى وندي مدرات للبول عشان نسحب الموية الزايدة دي ونخفف الضغط على "مواسير" الجسم، والجلد حيرجع لطبيعته براهو.
المرة الجاية حنتكلم عن نوع غريب جداً من البقاقات بيظهر للناس البيدخلوا في غيبوبة أو نوم طويل، وكيف إنو الضغط وانقطاع الأكسجين بيعمل ليهم بقاقات من نوع خاص.
#عيادات_بيت_العافية
#عيادة_الجلدية_أون_لاين