الليلة حنتكلم عن حالة نادرة لكنها مزعجة جداً، بالذات لما تحصل في الأطفال حديثي الولادة أو الرضع.
تخيل إنك بس تمسح أو تحك جلد طفلك بالراحة، وفجأة الحتة دي تحمر وتتنفخ وتعمل بقاقة مليانة موية وممكن أحياناً يكون فيها دم، الحالة العجيبة دي بنسميها كثرة الخلايا الصارية البقاقية أو (Bullous Mastocytosis).
في جسمنا في خلايا مناعية اسمها "الخلايا الصارية" ودي بتكون مليانة مواد كيميائية وإنزيمات هاضمة زي مادة التربتاز، في المرض ده، الخلايا دي بتكون متجمعة بكثرة غير طبيعية تحت الجلد، ولما تحك الجلد، فإنت حرفياً بتفجر الخلايا دي، وبتخلي الإنزيمات تطلع وتأكل الغراء والمسامير الماسكة الجلد ببعضه، فطوالي الجلد بفك وتتكون البقاقة
الحركة دي الدكتور بيسميها "علامة دارييه" (Darier's sign)، وهي إشارة بتأكد لينا إنو دي ما حساسية عادية ولا مرض مناعي، ولازم ننتبه شديد لأنو المواد دي لو طلعت بكميات كبيرة في الدم ممكن تعمل صدمة تحسسية خطيرة للطفل.
الحالة النادرة التانية الممكن تعمل بقاقات هي لما يتجمع بروتين شاذ اسمه "الأميلويد" تحت الجلد وفي جدران العروق الدموية، الحالة دي بنسميها الداء النشواني البقاقي أو (Bullous Amyloidosis)، وممكن تكون جرس إنذار لمشاكل داخلية في الجسم زي أورام الدم المرتبطة بالخلايا البلازمية.
البروتين ده لما يترسب بيخلي "الحيطة" حقت الجلد هشة جداً وقابلة للكسر من أقل ضربة، ولأنو بيضرب العروق ذاتها وبيخليها هشة، البقاقات دي غالباً بتكون مليانة دم وبتظهر معاها كدمات زرقاء في الجلد، وممكن كمان نلاحظ تضخم في اللسان
. التشخيص بتم بأخذ عينة وصبغها بصبغة معينة بتخلي البروتين ده يلمع بلون أخضر تفاحي مميز تحت المايكروسكوب.
المرة الجاية والأخيرة حنختم سلسلتنا دي بالخلاصة.. حنعرف روشتة التشخيص الصح، وليه بنحذر بشدة من إننا نستخدم كريمات الكورتيزون (عمال على بطال) لأي بقاقة تظهر لينا من غير ما نعرف سببها الحقيقي.
#عيادات_بيت_العافية
#عيادة_الجلدية_أون_لاين