الليلة حنتكلم عن مشكلة بتخلي الواحد يهرش يدينه وكراعينه لدرجة البكا، وفجأة يلقى حبوب صغيرة مدفونة تحت الجلد عاملة زي حبات (العدس)، وشوية شوية تتلم على بعض وتعمل بقاقات كبيرة ومزعجة جداً. الحالة دي بنسميها الإكزيما (التعرقية) أو (Pompholyx)، وهي نوع شائع بس عنيف جداً من إكزيما اليدين والقدمين.
الحاصل هنا إنو بتطور التهاب شديد بخلي الموية تندفع وتتجمع بين خلايا الجلد (زي الموية لما تتسرب بين طوب الحيطة)، والعملية دي بنسميها (Spongiosis) أو التباعد الخلوي، الموية دي بتقعد تضغط وتمط في الوصلات المربطة الخلايا ببعض لحدي ما الخلايا تفك وتنفصل عن بعضها تماماً، وتقوم تعمل لينا الفراغات المليانة موية أو البقاقات المشدودة دي.
حاجات كتيرة عايشينها يومي بتخلي المشكلة دي تهيج وتعمل البقاقات زي السخانة الشديدة، والرطوبة، وكثرة العرق، وحتى التوتر النفسي والزعل بيلعبوا دور كبير جداً كمحفز أساسي، ومرات بتكون بسبب تلامس مع مواد مهيجة (Contact dermatitis) زي صابون الغسيل القوي أو حساسية من معادن معينة بتمشي بنفس الميكانيكية حقت التباعد الخلوي دي.
الخدعة هنا إنو في الأطفال بالذات، البقاقات دي ممكن تكون شديدة وكبيرة ومخيفة لدرجة إنها تشبه تماماً مرض (الفقاع المناعي). لكن دكتور الجلدية بيقدر يفرق بينهم لما يتأكد من غياب الأجسام المضادة في الفحص، ويشوف علامات تباعد الخلايا دي تحت المايكروسكوب بدلاً من الانفصال الكامل لطبقات الجلد اللي بيحصل في الأمراض المناعية.
المرة الجاية حنتكلم عن نوع عجيب جداً من البقاقات، بيظهر ليك في نفس الحتة من جسمك كل ما تبلع حبة دواء معينة.. حكاية "التحسس الدوائي الثابت" وكيف الخلايا بتحقد وتنتقم.
#عيادات_بيت_العافية
#عيادة_الجلدية_أون_لاين