عادات يومية بتحمي معدتك.. وعادات بتدمرها وإنت ما جايب خبر
"يا دكتور، أنا عالجت الجرثومة وطلع الفحص سلبي، وبعد ستة شهور رجعت تاني! كيف؟"
السؤال ده بسمعه كتير، والمريض بيكون محبط ومستغرب وفاكر إنو الجرثومة "ما بتموت" أو إنو العلاج كان فاشل، الحقيقة في أغلب الحالات العلاج بكون ناجح فعلاً والجرثومة بتموت، لكن المريض رجع "التقطها" من جديد لأنو ما غير العادات والظروف اللي خلته يلتقطها أول مرة.
والنسبة دي في منطقتنا ما هينة، لأنو معدل إعادة الإصابة في البلدان النامية أعلى بكتير من الدول الغربية بسبب عوامل بيئية وسلوكية بنقدر نتحكم في كتير منها.
أول عادة ودي خطيرة جداً وأغلب الناس بعملوها ببراءة: بلع المسكنات زي الحلاوة!، البنادول العادي (الباراسيتامول) ما عنده مشكلة مع المعدة، لكن المسكنات من عائلة الـ NSAIDs زي الإيبوبروفين (بروفين) والديكلوفيناك (فولتارين) والأسبرين، دي عندها علاقة شريرة جداً مع H. pylori.
كل واحد فيهم براهو بضر جدار المعدة: الجرثومة بتآكل الطبقة المخاطية من تحت، والمسكنات بتآكلها من فوق، لما الاتنين يشتغلوا مع بعض، المعدة بتلقى نفسها محاصرة من جهتين، والقرحة بتظهر في زمن قياسي.
الدراسات لقت إنو الزول اللي عنده H. pylori وبياخد مسكنات NSAIDs بانتظام، القرحة بتظهر عنده في وقت أقصر بكتير مقارنة بزول عنده عامل واحد بس من الاتنين، عشان كدة كل الجمعيات الطبية العالمية بتوصي إنو أي زول حيبدأ ياخد مسكنات NSAIDs أو أسبرين لفترة طويلة، لازم يفحص للجرثومة الأول ويعالجها لو طلعت إيجابية قبل ما يبدأ المسكن، وده كلام كتير من مرضانا ما بعرفوه، وبمشوا الصيدلية ويشتروا البروفين "عادي" كل ما وجعهم راسهم أو ضهرهم أو ركبتهم، وما عارفين إنهم قاعدين يحفروا حفرة في معدتهم.
تاني عادة وللأسف منتشرة عندنا هي التدخين، وده بشتغل "ضد المريض" من كل الاتجاهات: بيضعف الطبقة المخاطية الحامية لجدار المعدة فبخلي الجرثومة تعمل ضرر أكبر، وبقلل تدفق الدم للمعدة فيبطئ عملية الالتئام، والأهم من كدة بقلل نسبة نجاح العلاج.
يعني المريض المدخن ممكن ياخد نفس الأدوية بنفس الجرعة ونفس المدة ويفشل العلاج عنده بينما ينجح عند زميله غير المدخن، الدراسات بتقول إنو التدخين مسؤول عن حوالي ربع حالات قرح المعدة عند الناس المصابين بالجرثومة، فلو إنت مدخن وعندك جرثومة معدة وداير تعالجها، التوقف عن التدخين مش "نصيحة صحية عامة" وخلاص، ده جزء أساسي من خطة العلاج.
تالت عادة وعلاقتها بالمعدة أساسية هي التوتر المزمن، ونحنا اتكلمنا في سلسلة المناعة الذاتية بالتفصيل عن كيف إنو "الهم" بتاع الليلة بختلف عن "الخوفة" بتاعت زمان، وكيف إنو الكورتيزول المرتفع باستمرار بكسر حواجز الجسم، وفي موضوع H. pylori بالذات، التجارب أثبتت إنو هرمونات التوتر (الجلوكوكورتيكويدات) بتزيد استعمار الجرثومة في المعدة، وبتخلي الجرثومة تتكاثر أكتر وتنتشر أكتر في الجدار المعدي.
رابع نقطة وهي حاسمة بالذات لمنطقتنا: النظافة ومصادر المياه. H. pylori بتنتقل في الغالب عن طريق الفم أو عن طريق المياه والأكل الملوث، وأغلب الناس بلتقطوها في الطفولة المبكرة، وفي السودان وبلدان كتيرة في أفريقيا والشرق الأوسط، التزاحم في البيوت، ومشاركة الأواني، وعدم توفر مياه نقية في كل الأماكن، كل ده بيزيد فرص انتقال الجرثومة من شخص للتاني، وبالذات من الأم للطفل ومن الأطفال لبعضهم.
الحلول هنا ما معقدة: غسل الأيدين بالصابون قبل الأكل وبعد الحمام، وتجنب مشاركة الملاعق والكبايات بين أفراد الأسرة (وده عندنا ثقافياً صعب لأنو الأكل من صحن واحد عادة متجذرة)، والتأكد من غلي أو تنقية مياه الشرب، وغسل الخضار والفواكه كويس جداً.
الحاجات دي ما بتقضي على الجرثومة لو هي أصلاً موجودة، لكنها بتمنع إعادة الإصابة بعد العلاج وبتقلل انتقالها للأطفال الصغار اللي لسه ما اتصابوا.
وهنا بنوصل لنقطة مهمة جداً بتخص العائلات: لو إنت عالجت الجرثومة ورجعت تاني، ممكن السبب يكون إنو زوجتك أو أولادك أو أي فرد في البيت حامل الجرثومة وبينقلها ليك من تاني، عشان كدة بعض الأطباء بوصوا بفحص أفراد الأسرة القريبين (بالذات الزوج/الزوجة والأطفال) لو المريض عالج وفشل العلاج أو رجعت الجرثومة.
خامس نقطة وهي سهلة التطبيق: الموية الكتيرة والأكل المنتظم، المعدة الفاضية لفترات طويلة بتكون معرضة أكتر لتأثير الحامض، ولما يكون في جرثومة قاعدة فيها، الفراغ ده بيخلي الضرر أكبر. الأكل المنتظم (وجبات صغيرة ومتكررة بدل وجبتين كبيرتين) بيساعد في معادلة الحامض، والموية الكافية بتحافظ على الطبقة المخاطية رطبة وقوية.
كده اتكلمنا عن الأكل والبروبيوتيك والعادات اليومية. فضل نخش في المواضيع العملية البحتة: أنا كمريض شاكك إنو عندي الجرثومة، أمشي أفحص كيف؟ ياتو فحص هو الأحسن؟ وياتو فحص بيغشني بنتيجة كاذبة؟ أسئلة عملية جداً ومهمة، وإجاباتها في البوست الجاي.
البوست القادم: كيف تفحص لجرثومة المعدة؟ وياتو فحص ما تعتمد عليه؟
#عيادات_بيت_العافية #عيادة_الجلدية_أون_لاين #جرثومة_المعدة_والجلد