النياسيناميد بقى "الجوكر" في عالم العناية بالبشرة، لأنه فعلاً ساحر في توحيد لون البشرة، وتصغير المسامات، وبقوي لينا حاجز الجلد عشان يحافظ على الرطوبة، ورغم إنه معروف بخصائصه المهدئة للالتهاب، إلا إنه في حالات نادرة ممكن يقلب العكس ويعمل تحسس، وهنا بندخل في دوامة التشخيص هل ده تحسس حقيقي ولا مجرد تهيج عابر.
الحقيقة إن التحسس الحقيقي من النياسيناميد (Allergic Contact Dermatitis) نسبته بسيطة جداً في الدراسات الطبية وما بتلقاه في المواد المئة الأولى بقوائم المواد المسببة للحساسية بين منتجات التجميل.
لكن المشكلة الحقيقية بتظهر لما نخلط بينه وبين حاجة بنسميها "Niacin Flush". الاحمرار ده عبارة عن رد فعل وعائي بحصل لما النياسيناميد يتحول لحمض النيكوتينيك نتيجة لوسط حمضي أو شوائب في التصنيع، فبعمل توسع في الأوعية الدموية وتوهج أحمر سريع وبروح سريع، عكس الحساسية المناعية من النوع المتأخر اللي بتظهر في شكل حكة وقشور وإكزيما واضحة بعد يومين أو تلاتة من الاستخدام.
في كتير من الأحيان، الظلم بقع على النياسينامايد نفسه (فيتامين B3) والسبب الحقيقي بكون في المواد الحافظة الزيادة في السيروم زي "الفينوكسي إيثانول" أو المواد اللي بتساعد على النفاذ والامتصاص زي الكحول.
عشان الواحد يتأكد تماماً، بننصح مرات باختبار بسيط ورا الأذن لمدة 72 ساعة، لكن النقطة الواحدة ورا الأذن لمرة واحدة ممكن تخدعنا وتدينا نتيجة سلبية كاذبة (False Negative) لأن جلد المنطقة ديك سميك ومختلف عن جلد الوش الرقيق، وممكن المادة التحسسية ما تكون وصلت للتركيز اللي بيستفز المناعة من أول مرة.
عشان كده، الطريقة الأدق هي "اختبار الاستخدام المتكرر" أو الـ ROAT، وده بأننا نخلي المريض يمسح نقطة من السيروم في نفس المكان (بالحفرة المرفقية جوه الكوع أو وراء الأذن) مرتين في اليوم لمدة أسبوع كامل، لو عدى الأسبوع ده من غير أي احمرار أو حكة، بنقدر نقول إن المنتج آمن، لأن الحساسية مرات بتكون تراكمية وما بتظهر إلا بعد ما حاجز الجلد يبدأ يتشبع بالمادة
في عوامل كتيرة تانية بتلعب دور في الحكاية دي، زي سلامة حاجز الجلد أصلاً؛ فلو الزول بشرته متهيجة أو بستخدم مقشرات قوية، النياسيناميد حيدخل للأعماق بسرعة أكبر وممكن يعمل رد فعل عنيف.
عشان نضمن أحسن نتيجة، بننصح الناس تبدأ بالتدريج، يعني السيروم يستخدموه يوم بعد يوم في البداية، وما يخلطوه مع أحماض قوية في نفس اللحظة، ويبعدوا عن التراكيز العالية المبالغ فيها اللي بتصل لـ 20% لو كانت بشرتهم من النوع الحساس، وبكده بنقدر نستفيد من فوائده من غير ما ندخل في مشاكل التحسس والتهيج.
#عيادة_الجلدية_أون_لاين
#عيادات_بيت_العافية