الشرارة الأولى.. كيف جلدك بولع النار في جسمك

"الشرارة الأولى.. كيف جلدك بولع النار في جسمك"

"يا دكتور، الحتة دي كانت عادية وفجأة بعد ما خربشتها طلعت فيها قشور!"

الجملة دي بسمعها كتير، وهي بتوصف بدقة "لحظة الاشتعال" اللي بتبدأ منها قصة الصدفية، خربشة، جرح بسيط، التهاب حلق، أو حتى ضغط نفسي شديد، وفجأة الجلد بقلب عليك، فشنو الحاصل بالضبط جوه الجلد في اللحظة دي؟

صفارة الإنذار الكاذبة

تخيل معاي إنو خلايا جلدك عبارة عن "سكان" عايشين في حي هادي، لما يحصل ضرر (جرح، عدوى، احتكاك)، الخلايا المتضررة دي بتصرخ وبتطلق مادة اسمها (LL-37) أو "الكاثيليسيدين"، المادة دي في الوضع الطبيعي مفروض تكون "صفارة إنذار" مؤقتة عشان تنادي الحراس يجوا يصلحوا الضرر ويمشوا، يلا في الصدفية، الصفارة دي ما بتسكت، بل بتتحول لـ "بلاغ كاذب" مستمر بنادي قوات خاصة ما كان في داعي ليها أصلاً.

المادة دي بتمسك في الحمض النووي (DNA) المتسرب من الخلايا المتضررة وبتعمل معاه "مركب" غريب، المركب ده بمشي ينبه نوع من الحراس اسمهم "الخلايا الشجرية" (Dendritic Cells) ، الحراس ديل لما يتنبهوا، بعتبروا إنو في غزو حقيقي حاصل، فبطلقوا موجة أولى من مادة الإنترفيرون (IFN-α/β) اللي بتصحي كل الجيش.

القائد اللي بولع الحرب: IL-23

هنا بدخل البطل الشرير في القصة كلها، الخلايا الشجرية المتنبهة دي بتبدأ تفرز مادة اسمها (IL-23)، وده "القائد الميداني" اللي بيحرك الحرب كلها، الـ IL-23 بمشي يجند نوع من الخلايا المناعية اسمها (Th17) و(Tc17) وبقول ليهم: "هجوم شامل"، الخلايا دي بتتجمع في الجلد وبتبدأ تطلق "القنابل الحارقة" بتاعتها: (IL-17A) و(IL-17F) و(IL-22) و(TNF-α)

كل قنبلة من ديل ليها شغلة محددة في الدمار، الـ IL-17 بيأمر خلايا الجلد إنها تتكاثر بجنون ويأمر كمان بتجنيد النيتروفيلز (كريات الدم البيضاء) اللي بتتجمع في الطبقة القرنية وتعمل "خراجات مجهرية" اسمها (Munro Microabscesses) والتكاثر المجنون ده هو البدي القشور شكلها الفضي المميز، أما الـ IL-22 فده المسؤول عن الكارثة الكبيرة اللي بتحصل في "خط الإنتاج".

خط الإنتاج المجنون

في الجلد الطبيعي، الخلية الجلدية بتتولد في القاع وبتمشي رحلة هادية لحدي ما توصل السطح وتتحول لخلية ميتة قوية بتحمي الجسم، الرحلة دي بتاخد حوالي 28 لـ 30 يوم، في الصدفية، الـ IL-22 بيخلي "المصنع" يتجنن ويسرّع الإنتاج لدرجة إنو الرحلة دي بتنضغط من شهر لـ 3 لـ 5 أيام بس، تخيل مصنع طوب بدل ما يطلع طوب مستوي وجاف، بقى يقذف طوب ني لسه طري، فالحيطة البتتبني بيهو حتكون هشة ومفرتقة وما بتحمي حاجة، الطوب الني ده هو "القشور" اللي بتشوفها فوق البقع الحمراء الفضية بتاعت الصدفية.

ومع التكاثر الجنوني ده، الأوعية الدموية في الجلد بتتمدد وبتتلوى عشان تغذي كل الخلايا الجديدة دي، وده اللي بيعمل اللون الأحمر الناري تحت القشور، ولو شلت القشرة بتلقى نقط دم صغيرة بتطلع، ودي اسمها "علامة أوسبتز" (Auspitz Sign)، وهي علامة مميزة جداً للصدفية بيعرفها كل طبيب جلدية.

الحلقة المفرغة

الكارثة إنو الدمار ده ما بيقيف، لأنو الخلايا الجلدية المتضررة من الهجوم بتطلق مزيد من الـ LL-37 والمواد الالتهابية، فبتنادي مزيد من الخلايا الشجرية، فبيزيد الـ IL-23، فبيزيد الـ Th17، فبيزيد الدمار، فبتتضرر خلايا أكتر، وهكذا في دائرة مغلقة ما عندها نهاية، العلماء بيسموها "الدائرة التلقائية" (Feed-Forward Loop)، يعني الحريق قاعد يولد وقوده بنفسه.

وده بالضبط اللي بيفسر لينا ليه الصدفية مرض "مزمن" ما بخفت مع الزمن، لأنو المحرك الأساسي ليها (محور IL-23/Th17) شغال في حلقة مفرغة ما في زول بيقدر يوقفها بدون تدخل علاجي بستهدف حلقة بعينها في السلسلة دي.

وده كمان بفسر لينا ليه الأدوية الحديثة اللي بتستهدف IL-23 أو IL-17 بتجيب نتائج مذهلة مقارنة بالأدوية القديمة اللي كانت بتكبت المناعة "بالجملة"، لأنها بتقطع السلسلة في الحلقة المحددة بدل ما تقصف المدينة كلها عشان تطفي حريق في حي واحد.

طيب، سؤال محير: لو الحريق انطفى والجلد رجع نظيف تماماً، ليه البقعة بترجع في نفس المكان بالضبط بعد شهور أو سنين؟ في "ذاكرة" مخيفة مزروعة جوه جلدك، وقصتها قصة.

البوست القادم: "الندبة الخفية.. ليه الصدفية بترجع في نفس المكان."

#عيادات_بيت_العافية #عيادة_الجلدية_أون_لاين #الصدفية