حنبدا بمرض الجرب (Scabies)، واللي بتميز بحكة ليلية شديدة جداً ما بتخلي الزول ينوم، العلامات بتاعته بتظهر في شكل أنفاق صغيرة أو خطوط رفيعة على عمود القضيب، وكيس الصفن، وحتى بين أصابع اليدين، كمان ممكن يعمل عقد أو حبوب بارزة على كيس الصفن ورأس القضيب، المشكلة الأساسية في الجرب إنو سريع العدوى جداً وبنتشر بسرعة بين أفراد البيت الواحد بالملامسة المباشرة
العلاج بتاع الجرب متوفر وفعال، وغالباً بنستخدم كريم بيرميثرين بتركيز خمسة في المية، بتمسح من الرقبة لحدي أسفل القدمين، وبتخلى في الجسم من تمنية لاتناشر ساعة وبعدين يتغسل، والجرعة دي بتتعاد بعد سبعة أيام، في خيار تاني وهو حبوب الإيفرمكتين، ودي بتتاخد على جرعتين بينهم أسبوع، لكن السر الحقيقي في نجاح العلاج والتخلص من الجرب نهائياً هو إنو لازم كل أفراد البيت يتعالجوا في نفس الوقت، ولازم نغسل كل الملايات والملابس بموية حارة جداً وتتشر في الشمس الحارة ساعات أو تتربط في كيس عازل لثلاثة أيام عشان نقضي على الطفيل وما يرجع تاني
الحاجة التانية اللي بتعمل حكة شديدة هي قمل العانة (Pubic lice)، وده بعمل حكة مزعجة جداً في منطقة شعر العانة، وممكن بالعين المجردة نشوف حشرات صغيرة جداً حجمها من مليمتر لمليمترين ولونها رمادي مايل للبني، أو نشوف بيض القمل والصيبان لاصق بقوة في شعرات العانة
العلاج بيكون باستخدام كريم أو لوشن بيرميثرين بتركيز واحد في المية، ولازم برضو نعيد العلاج بعد سبعة لعشرة أيام عشان نضمن القضاء على أي بيض فقس جديد، وفي حالة الإصابة بقمل العانة، دائماً بننصح المريض إنو يعمل فحص شامل لباقي الأمراض المنقولة جنسياً عشان نطمن على صحته بالكامل، الموضوع ده علاجه ساهل جداً لو اتبعنا التعليمات وعالجنا كل الناس المخالطين في البيت وما خجلنا من طلب العلاج
في المنشور الجاي عشان نتكلم عن موضوع مهم وهو البهاق التناسلي، وكيف نفرق بينه وبين أمراض تانية ممكن تكون خطيرة
وزي ما اتفقنا في المنشور الأول، ممكن تبحثوا بالأسماء دي بالانجليزي في صور جوجل (Google Images) وتضيفوا كلمة بشرة داكنة (Dark skin) عشان تتعرفوا على شكلها في لون بشرتنا المعتاد
#عيادة_الجلدية_أون_لاين
#عيادات_بيت_العافية
#الصحة_التناسلية