العلامات الحميدة

الليلة حنتكلم عن الحاجات الطبيعية اللي بتخوف الناس بدون مبرر، كتير بجيني في العيادة شباب أو شابات في قمة الرعب والخوف عشان لاحظوا وجود نتوءات (Bumps) أو حبوب في المناطق الحساسة (Genital area)، وبكونوا متخيلين إنها مرض خطير أو حاجة منقولة جنسياً ، لكن الحقيقة إنو في حاجات بنعتبرها مجرد اختلافات طبيعية حميدة في تركيبة الجسم وممكن نراقبها بأمان في البيت

من أشهر الحاجات دي بقع اسمها بقع فوردايس (Fordyce spots)، ودي عبارة عن حبيبات أو حطاطات صغيرة جداً (Small papules) حجمها من مليمتر لمليمترين ، ولونها بيكون أصفر باهت أو أبيض (Pale yellow/white) ، وبتظهر على عمود القضيب (Penile shaft) أو كيس الصفن (Scrotum) عند الرجال، وعلى الشفرين (Labia) عند النساء، الحاجة دي طبيعية تماماً وموجودة عند أغلبية البالغين ، وهي ببساطة عبارة عن غدد دهنية طلعت في مكان غير معتاد (Ectopic sebaceous glands) وما بتحتاج أي علاج نهائياً ، بس محتاجة نطمن المريض

تاني حاجة بتعمل قلق كبير للشباب هي حبيبات اللؤلؤ القضيبية (Pearly penile papules أو اختصاراً PPP)، دي بتظهر في شكل نتوءات صغيرة بلون الجلد وشكلها زي القبة، وبتكون مرتبة بانتظام في صف واحد أو صفين متماثلين حول تاج أو رأس القضيب (Corona of the glans)، الحاجة دي طبيعية جداً وبتكون موجودة عند تلاتين لخمسين في المية من الرجال بعد البلوغ ، وهي ما معدية أبداً وما عندها أي علاقة بالأمراض المنقولة جنسياً، للأسف الشديد مرات بتتشخص غلط على إنها ثآليل تناسلية (Genital warts) وبحصل تدخل وعلاج بالكي بالتبريد (Cryotherapy) ما ليهو أي لازمة ، بينما التصرف الوحيد المطلوب هو طمأنة المريض بس وإنو يعرف إنها حاجة طبيعية وما بتخوف

كمان في نتوءات تانية بتظهر غالباً بعد عمر التلاتين وبتزيد مع التقدم في السن ، وبتكون في شكل حبيبات دائرية لونها أحمر غامق، أو بنفسجي، أو حتى أسود مزرق، وبتطلع على كيس الصفن عند الرجال أو الشفرين الكبيرين عند النساء، دي بنسميها الأورام الوعائية الكيسية (Angiokeratoma of Fordyce) ، وهي عبارة عن توسع حميد في الأوعية الدموية الدقيقة، وهي حاجة حميدة وممكن نراقبها في البيت بأمان، بس مرات ممكن تنزف لو اتعرضت لخدش أو احتكاك، العلاج بتاعها بكون بس لو مضايقاك في الشكل أو لأسباب تجميلية أو بتنزف كتير

لكن في نقطة مهمة لازم ننبه ليها هنا، لو الحبيبات دي ظهرت بكميات كبيرة ومفرطة جداً عند زول صغير في العمر أو ظهرت معاها أعراض تانية، هنا لازم نراجع الدكتور المتخصص لأنها ممكن تكون مؤشر لمرض نادر اسمه مرض فابري (Fabry disease) وهو مرض بأثر على التخزين داخل الخلايا (Lysosomal storage disorder)

معرفة الحاجات الطبيعية دي بتريح البال وبتوفر عليكم قلق وتفكير ما ليهو داعي، زي ما اتفقنا في المنشور الأول، ممكن تبحثوا بالأسماء دي بالانجليزي في صور جوجل (Google Images) وتضيفوا كلمة بشرة داكنة (Dark skin) عشان تتعرفوا على شكلها في لون بشرتنا المعتاد، وخلوكم متذكرين دائماً، متين نقلق ونمشي للدكتور؟ لو ظهرت ليك قرحة (Ulcer)، أو حاجة بتكبر بسرعة، أو حكة ما بتنتهي ومستمرة أكتر من أسبوعين، أو ألم ما طبيعي

انتظروني في المنشور الجاي عشان نتكلم عن الفطريات التناسلية (Candidiasis) بالتفصيل

#عيادة_الجلدية_أون_لاين

#عيادات_بيت_العافية

#الصحة_التناسلية