الكلف والتصبغات بعد الالتهاب من أكتر الشكاوى البتجي للعيادة الجلدية في السودان والخليج، والكلف بصيب نسبة كبيرة من السودانيات خاصة في عمر الإنجاب، والتصبغات بعد الالتهاب بتلاحق أصحاب البشرة الداكنة بعد كل حبة شباب أو إصابة بسيطة، والسبب الجذري في الاتنين واحد، تنشيط مفرط للخلايا الصبغية (melanocytes) في البشرة الداكنة، والمحفز الأول هو الضوء المرئي والأشعة فوق البنفسجية معاً.
وسبب التفاعل ده، الخلايا الصبغية عندنا أنشط من البشرة الفاتحة، وبتنتج ميلانين أكتر مع أي محفز، الضوء المرئي بالذات بحرض الميلانين زي ما عرفنا في البوست التاني، والأشعة فوق البنفسجية بتزيد من تنشيط الإنزيمات المسؤولة عن إنتاج الصبغة، يعني كل ساعة شمس بدون حماية هي ساعة بتعمق البقع الموجودة وبتخلق بقع جديدة.
والنقطة الأهم في علاج الكلف والتصبغات بعد الالتهاب، هي أن واقي الشمس بكون ركن أساسي من العلاج نفسو، أي مريضة بتجي للعيادة بكلف وبتستخدم هيدروكينون أو حمض الكوجيك أو الأزيلايك بدون واقي شمس مناسب، حتفشل في العلاج، والدراسات بتقول إنو نسبة عودة الكلف بتصل لـ 80% خلال 6 شهور لو الواقي ما متبع بانتظام.
والواقي الأمثل في علاج الكلف والتصبغات لازم تتوفر فيهو ثلاث شروط معاً، SPF 50+ مع PA++++، broad spectrum بحمي من UVB و UVA الاتنين، وفيهو أكاسيد حديد (iron oxides) للحماية من الضوء المرئي، الشرط الأخير ده هو الفارق بين علاج البنجح والعلاج البفشل في البشرة الداكنة.
ومن النقاط العملية المهمة، الميلانين بتحفز خلال دقائق من التعرض للضوء المرئي، حتى لو طلعتي من البيت ساعة بالعصر للسوق وما ما عملة واقي، البقع حتبدأ تبقى أعمق قبل ما تصلي لأول دكان، عشان كده الواقي بنمسحو قبال الخروج بعشر دقائق على الأقل، والمسح بنعيدو كل ساعتين لو في تعرض مستمر للشمس، أو ببودرة ملونة بأكاسيد الحديد فوق الميكب كل 3 ساعات.
وفي عادات بنخت بيها أنفسنا في الخطر بلا داعي، السواقة في الظهر بدون واقي، الجلوس قصاد الشباك في المكتب، الطلعة للسوق ساعة الذروة، كل دي مواقف بتزيد الكلف، ولو في فترة علاج نشط، الحماية لازم تكون شاملة، قبعة عريضة، نضارة شمسية، مع الواقي، ونتذكر أنو الإحساس بالحرارة ما بضمن الأمان، الضوء المرئي بضرب بقوة بلا أي حرارة محسوسة.
في البوست الجاي حندخل في عالم البشرة الحساسة، الإكزيما والوردية وحب الشباب، وكيف نختار واقي شمس بحمي بدون ما يهيج البشرة الهشة.
ودمتم بصحة وعافية 🌿
#حكاية_الشمس_والبشرة #عيادات_بيت_العافية #عيادة_الجلدية_أون_لاين