حب الشباب اضطراب للجسد كله

الفهم الشعبي بقول حب الشباب بيعني انو الوش اتوسخ شوية، أو الغدد زادت شغلها شوية، والبكتيريا لقت ليها فرصة، فطلعت البثور، عشان كده بتلقى الزول بيغسل وشو بعنف، وينشفو زيادة، ويفتش عن أي حاجة "تقتل البكتيريا" كأنو داخل معركة تعقيم

لكن الفهم العلمي الحديث بقول حاجة أعمق من كده بكتير، حب الشباب ما مجرد عدوى سطحية في الجلد، وما مجرد مرحلة عمرية بتعدي براها عند كل الناس، هو اضطراب التهابي مناعي-أيضي، يعني فيهو تفاعل بين الجلد، وجهاز المناعة، والهرمونات، وإشارات الأكل والطاقة الجوا الجسم، البثرة البنشوفها فوق الوش هي آخر مشهد ظاهر، أما المسرح الحقيقي فغالبا شغال تحت الجلد من أسابيع

الجلد في القصة دي ما هو البطل الوحيد، في محور كامل بربط البشرة بالأمعاء وبالجهاز الهرموني، والأمعاء فيها ميكروبات نافعة وضارة بتأثر على الالتهاب العام في الجسم، والهرمونات، خصوصا إشارات الإنسولين والعامل النموي شبيه الإنسولين رقم واحد (IGF-1)، بتأثر على نشاط الغدد الدهنية وعلى طريقة انقسام خلايا البصيلة، إذن لما نقول حب الشباب اضطراب مناعي-أيضي، بنقصد إنو الجسم كلو داخل في الحكاية، ما الوش براهو

وهنا بتجي المفاجأة المهمة: البكتيريا الجلدية الشائعة (Cutibacterium acnes) موجودة في بشرة الناس العندهم حب شباب، وبرضو موجودة في بشرة الناس الما عندهم، فالمشكلة ما إنو الزول "اتعدى" ببكتيريا جديدة، ولا إنو وشو وسخان، المشكلة في توازن المجتمع الميكروبي الجوا البصيلة، بعض السلالات بتكون أهدأ وأقرب للصداقة مع الجلد، وبعضها بتولع المناعة وتخليها ترد بعنف، دي بنسميها حالة خلل في الميكروبيوم (dysbiosis)، يعني الجيران نفسهم ما اتغيروا، لكن نظام الحي اتلخبط

الأغرب من كده إنو الالتهاب ما بجي بعد البثرة، الالتهاب ببدأ قبالها، تحت الجلد، فجهاز المناعة ممكن يكون شغال في صمت، وبرسل إشارات ويجهز المسرح، وبعد أسابيع تظهر البثرة كأنها بدأت فجأة، عشان كده العلاج الصحيح ما بكون ضربة سريعة فوق الحبة الظاهرة، العلاج الصحيح بحتاج فهم للبيئة البتخلي الحبوب تتولد من الأصل

والقصة كلها بتبدأ من حاجة صغيرة ما بشوفها الزول بعينو، حنتكلم عنها في البوست الجاي

#حكاية_حب_الشباب #عيادات_بيت_العافية #عيادة_الجلدية_أون_لاين