انتبهوا للتسمم بفيتامين د

مرت علي حالتين تسمم بفيتامين د مؤخرا، والناس بقت تبلع في الحبوب دي زي البونبوني بدون حساب 🍬، طبعاً هو فيتامين مهم شديد للعضم والمناعة، لكن المشكلة إنه من الفيتامينات البتذوب في الدهون (Fat-soluble)، يعني الجسم ما بقدر يتخلص من الزيادة فيها في البول بسهولة؛ بل بالعكس، بقعد يتخزن في الدهون والكبد لشهور طويلة

عشان كده، الجرعات العالية بدون رقابة بتدخلنا في حتة تانية خالص اسمها تسمم فيتامين د (Vitamin D Toxicity)، وده غالباً بحصل بمسارين؛ إما غلطة مطبعية بحيث المريض يغلط في قراية الروشتة أو العلبة، ويأخد حبة الـ 50,000 وحدة دولية (البتتأخد مرة في الأسبوع) ويبلعها يومياً بدل حبة الـ 5,000 وحدة 🤦‍♂️، أو الاستمرار الأعمى لما مريض ياخد الفيتامين لشهور وسنوات طويلة لمجرد إنه زمان لقى عنده نقص، ويستمر يبلع بدون ما يعمل فحص دم دوري يوريه وصل وين

الرقم السحري هنا هو 100 ng/ml، لو فحصك ظهر أكتر من الرقم ده، إنت كده رسمياً دخلت في مرحلة الزيادة والتسمم، والتصرف هنا بيعتمد على جسمك حاسي بشنو

النوع الأول هو المريض العنده أعراض (Symptomatic)، والزيادة الكبيرة دي بتعمل حاجة أساسية، بتمتص كالسيوم كتير جداً من الأكل ومن العضم وتجيبه في الدم (Hypercalcemia)، الكالسيوم الزايد ده هو البيعمل الأعراض وبيتعب الجسم، والمريض هنا بشتكي من جفاف وعطش شديد وتبول كتير لأن الكلى بتحاول تطرد الكالسيوم الزايد 💧، مع مشاكل في الجهاز الهضمي زي الغثيان، الاستفراغ، وفقدان الشهية، مع إمساك شديد 🤢، دا غير التعب والخمول والمريض بكون حاسي بروحه مهبط، وممكن يدخل في تشوش ذهني أو كوابيس، وآلام شديدة في العضم والمفاصل 🛌؛ المريض لو وصل المرحلة دي وظهرت عليه الأعراض دي مع كالسيوم عالي في الدم، فلازم يمشي المستشفى فوراً عشان يدوه دربات محاليل (Normal Saline) تغسل الكلى وتنزّل الكالسيوم، وممكن يحتاج أدوية تانية زي الكورتيزون عشان توقف امتصاص الفيتامين

النوع التاني هو المريض الما عنده أعراض (Asymptomatic)، وفي ناس كتيرة بتعمل الفحص بالصدفة وتلقى الرقم فوق الـ 100 ng/ml وممكن يصل 150، لكن سبحان الله، لسه ما ظهرت عليهم الأعراض الفوق دي والكالسيوم بتاعهم لسه متزن، الناس دي بنتعامل معاها بـ "هدوء حذر" برة المستشفى، لكن ما ساي، لازم نعمل فحوصات فورية (Investigations) عشان نطمئن على الكلى وباقي المعادن

الفحوصات دي بتشمل Serum Calcium (Total/ Ionized) عشان نشوف الكالسيوم الحر في الدم وصل مرحلة الخطر ولا لسه 🧪، وفحص وظائف الكلى Kidney Function Tests (Creatinine / BUN) لأن الكالسيوم الزايد ممكن يترسب في الكلى ويعمل حصاوي أو يأثر على كفاءتها 🧬، وكمان فحص الهرمون الجار درقي Parathyroid Hormone (PTH) وده بكون "نايم ومثبط" شديد في حالات التسمم دي

الخطة العلاجية والنصائح (Advice) هنا واضحة ومباشرة عشان ننزل النسبة دي بأمان، أول حاجة وقف الفيتامين فوراً، واقطع أي نقط، حبوب، أو مكملات فيها فيتامين د تماماً 🛑، وبما إنه بتخزن في الدهون، النسبة دي حتأخد أسابيع وممكن شهور عشان تنزل للمستوى الطبيعي، تاني حاجة حظر الكالسيوم، يعني وقف أي مكملات كالسيوم، وقلل من الأكل الغني بالكالسيوم لفترة مؤقتة زي منتجات الألبان والأجبان والأكل المدعم عشان ما نغذي الزيادة الدائرة في الدم 🥛، تالت حاجة اشرب موية كتير، لأن السوائل والموية هي خط الدفاع الأول؛ بتنشط الكلى وتساعدها تطلع الكالسيوم أول بأول وتمنع الجفاف وترسب الحصاوي 💧، وآخر حاجة المتابعة الدورية، لازم تعيد فحص فيتامين د وفحص الكالسيوم كل أسبوعين لـ 4 أسابيع لحد ما نطمن إن الأرقام رجعت للمستوى الآمن وأقل من 50 ng/ml

الصحة عافية يا جماعة، والفيتامينات دي أدوية بجرعات محددة ما مكملات ساكت نبلعها على كيفنا، لو فحصك عالي، اتبع الخطوات دي وراجع طبيبك في عيادتك عشان يرتب ليك الجرعات القدام

#عيادات_بيت_العافية

#عيادة_الجلدية_أون_لاين

#تسمم_فيتامين_د