صدفية الظفر والتهاب المفاصل الصدفي

في ناس بتعرف الصدفية من القشرة الفضية في الكوعين والركب، لكن أحياناً أول باب بيفتح القصة بكون الظفر

صدفية الظفر (Nail Psoriasis) علامة مهمة، لأن الظفر قريب جداً من مفصل آخر الإصبع ومن أماكن التصاق الأوتار، المنطقة البنسميها enthesis، عشان كدا الظفر والمفصل مرات بكونوا جزء من نفس الحريق الالتهابي، فالمريض البقول "أظافري بس تعبانة" ممكن يكون عندو بداية التهاب مفاصل صدفي (Psoriatic Arthritis) لسه ما اتشاف بوضوح

العلامات البتخلينا نفكر في الصدفية هي الحفر الصغيرة (Pitting)، بقعة الزيت (Oil-drop sign)، الانفصال الجزئي، التفتت، والسماكة تحت الظفر، خصوصاً لو في قشرة بفروة الرأس، بقع في الكوعين والركب، حكة مزمنة، أو تاريخ صدفية في الأسرة، لكن المشكلة إن الفطريات بتعرف تقلد الصدفية، والصدفية برضو ممكن تفتح الباب للفطريات، فالتشخيص بالعين براهو مرات بكون ظالم للظفر

عشان كدا قبال ما نقول "دي فطريات" وندي علاج بالشهور، أو نقول "دي صدفية" وندخل في علاجات قوية أو بيولوجية، لازم نعمل التفتيش الصاح: كشط من الظفر، أو فحص بالديرمسكوب، وأحياناً تزريع للفطريات حسب الحالة، النتيجة دي بتفرق شديد، لأن علاج الفطريات مختلف، وعلاج الصدفية مختلف، ووجود الاتنين مع بعض ممكن يحصل

الحتة الأهم هي سؤال المفاصل، هل في ألم أو تورم في مفاصل الأصابع؟ هل الإصبع كله بقى منفوخ زي السجوك؟ هل في تيبس صباحي بيفك بعد الحركة؟ هل في ألم في الكعب أو أسفل الظهر؟ الأسئلة دي ما بعيدة من الظفر، لأنها بتفتش عن التهاب المفاصل الصدفي، والتشخيص البدري فيهو أحسن بكثير من المتأخر

العلاج بعتمد على الشدة: أحياناً كريمات وحقن موضعية، وأحياناً علاج جهازي لو الأظافر كثيرة أو في أعراض بالمفاصل، لكن لازم الصبر، لأن الظفر بطيء وما برد بسرعة، والتحسن الحقيقي بنقيسو بالشهور، ما بالأيام

في البوست الجاي حنقابل واحد من ألغاز الظفر: ورم صغير جداً، لكن ألمه مع البرد ممكن يخلي الإصبع كلو يصرخ

الحلقة القادمة: ورم القلوموس

#حكاية_الظفر #عيادات_بيت_العافية #عيادة_الجلدية_أونلاين

#حكاية_الظفر #عيادات_بيت_العافية #عيادة_الجلدية_أون_لاين