بدائل الرتنول والريتينويدات التقليدية

عشان نفهم الفرق بين البدائل والريتينويدات التقليدية، لازم نرجع لحاجة مهمة، الجلد في النهاية ما مهتم باسم الكريم المكتوب في العلبة، لأن الأثر بتحقق بالمادة النهائية البتشتغل جوا الخلايا، ودي إسمها Retinoic Acid

ممكن تتخيل الموضوع كأنك داير تصل لمدينة واحدة لكن عندك طرق مختلفة، بعض الطرق قصيرة ومباشرة، وبعضها أطول وأبطأ، وكل ما كانت الخطوات أقل، كانت الفعالية أقوى، لكن غالباً التهيج بزيد معاها برضو

واحد من أهم البدائل الحديثة هو الـ Retinaldehyde،زي في Avene Retrinal 0.1 Intensive Cream المادة دي واقفة على بعد خطوة واحدة فقط من الـ Retinoic Acid النهائي، عشان كده تعتبر من أقرب البدائل للريتينويدات الطبية الحقيقية، الدراسات السريرية أظهرت إنو فعّال بصورة ممتازة في تحسين انسداد البصيلات وتقليل الحبوب الخفيفة وآثارها، مع تهيج أقل بحوالي أربعين بالمية مقارنة بالتريتينوين التقليدي، عشان كده بنلقاه خيار جميل للناس البتحتاج فعالية قريبة من الريتينويد لكن بشرتها ما متحملة المعركة اليومية مع الجفاف والاحمرار

بعدو ظهر جيل أحدث اسمو Granactive Retinoid أو Hydroxypinacolone Retinoate، الحكاية المميزة في المادة دي إنها ما محتاجة سلسلة طويلة من التحويلات داخل الجلد، وبتقدر ترتبط بمستقبلات الريتينويد بصورة مباشرة، زي في The Ordinary Granactive Retinoid 2% عملياً الناس غالباً بتحس إنها ألطف من التريتينوين ومن بعض أنواع الريتينول، لكن النتائج مرات بتظهر بصورة أبطأ وبتحتاج صبر أكتر، عشان كده بقت منتشرة في منتجات حديثة كتيرة، خصوصاً عند الشركات البتركز على البشرة الحساسة

أما النجم المشهور في عالم السوشيال ميديا فهو الـ Bakuchiol، المادة دي مستخلصة من نبتة اسمها Psoralea corylifolia، وهي في الحقيقة ما ريتينويد أصلاً، لكنها بتشتغل على عدد من المسارات البيولوجية المشابهة للريتينويدات، في دراسة معروفة نُشرت سنة 2019، تمت مقارنة Bakuchiol بتركيز 0،5% مع Retinol بتركيز 0،5%، وكانت النتائج متقاربة جداً في تحسين التجاعيد والتصبغ، مع تهيج أقل عند مستخدمي الباكوتشيول

طبعا كلها ما بقوة العلاجات التقليدية لكن عندها استخدامات مهمة:

أولاً عند أصحاب البشرة الحساسة جداً البتتهيج من أقل كمية تريتينوين، ثانياً عند الناس البوقفوا العلاج بسبب مرحلة الـ purge أو زيادة الحبوب المؤقتة في البداية، وثالثاً عند الحوامل، خصوصاً مع الـ Bakuchiol، لأنو ما من عائلة الريتينويدات المعروفة بمحاذير الحمل

ومن هنا بنواصل لخيارات مهمة تانية وفعالة، حتكون موضوع المنشور الجاي

#حكاية_حب_الشباب #عيادات_بيت_العافية #عيادة_الجلدية_أون_لاين