أكبر كذبة في عالم العناية بالبشرة هي: "الكريم ده بعالج حفر حب الشباب"، لأن الحفرة معناها إنو في نسيج مفقود وكولاجين ناقص تحت الجلد، والنسيج المفقود ما برجع بكريم بس، هنا اتجاوزنا مرحلة العناية سطحية، وبقينا محتاجين هندسة
قبل أي علاج، لازم نعرف نوع الندبة، ما كل الحفر شبه بعض، في ندبة اسمها Icepick، ضيقة وعميقة كأن زول غرز مثقاب صغير في الجلد، ودي غالباً أصعب الأنواع لأنها ماشّة لتحت أكتر من عرضها، وفي Boxcar، حفرة أعرض بحواف حادة، ممكن تكون سطحية أو عميقة، كأنها مربع صغير نازل في الجلد، وفي Rolling، دي ما عندها حواف حادة، شكلها موجي وناعم، والسبب غالباً ألياف شادة الجلد من تحت، فبتعمل تموجات في الوش
عشان كده علاج الندوب ما فيهو وصفة واحدة، الـ Microneedling، زي Dermapen أو SkinPen، بستخدم إبر دقيقة بأعماق مختلفة، غالباً من 0،5 إلى 2،5 مليمتر، عشان يعمل إصابات صغيرة محسوبة توقظ الجلد وتخليهو يبني كولاجين جديد، ده خيار جميل للـ boxcar السطحي والـ rolling الخفيف، وآمن نسبياً في البشرة الداكنة لأنو ما بستهدف الميلانين ولا بحرق السطح زي بعض الليزرات، غالباً بنحتاج أربعة إلى ستة جلسات، وبين الجلسة والتانية حوالي شهر، ولمن نضيف PRP، يعني البلازما الغنية بالصفائح، النتائج ممكن تبقى أحسن، وبعض الدراسات بتتكلم عن تحسن إضافي في حدود عشرين إلى تلاتين بالمية عند ناس مختارين
أما الـ Subcision، أو التقطيع تحت الندبة، فده بطل الـ rolling scars، الفكرة إن الطبيب بدخل إبرة خاصة، أحياناً Nokor، تحت تخدير موضعي، ويفك الألياف الشادة الجلد من الأسفل، أول ما الألياف دي تتحرر، الجلد بلقى فرصة يطلع لفوق، عشان كده بعض النتائج بتكون واضحة من بدري ومثيرة للمريض، خصوصاً في الخدود المتموجة، مرات جلسة واحدة تفرق، ومرات بنحتاج جلستين أو تلاتة، في البشرة الداكنة الإجراء آمن نسبياً، بس الكدمات واردة، وممكن تقعد أيام أو أسبوعين، فلازم الزول يحسب زمنو لو عندو مناسبة
للـ Icepick، عندنا تقنية مختلفة اسمها TCA CROSS، اختصار لـ Chemical Reconstruction of Skin Scars، ودي نقطة حمض قوية جداً، غالباً TCA بتركيز 70 إلى 90%، بتتخت بدقة شديدة بدبوس خشب أو أداة صغيرة في قاع الحفرة ذاتها، الهدف إننا نعمل التهابا مركز داخل الندبة، فيبدأ الجلد يبني كولاجين ويرفع القاع تدريجياً، دي من التقنيات القليلة البتخاطب الحفر الضيقة العميقة بذكاء، وغالباً بنحتاج لتلاتة إلى أربعة جلسات بفاصل شهر، بس في البشرة السمراء لازم الدقة تكون عالية، لأن نقطة زيادة خارج الحفرة ممكن تعمل تصبغ أو ندبة جديدة
وفي ندوب ما بتكفي معاها الإبر ولا الحمض، هنا بندخل في تقنيات الـ Punch excision بنقطع الندبة العميقة بمشرط دائري صغير ونخيط الجلد، وده مناسب لبعض حفر الـ icepick العميقة، وفي Punch elevation بنرفع قاعدة ندبة boxcar العميقة المتساوية الحواف بدل ما نقطعها كلها، كأننا بنرجع الأرضية النازلة لمستوى الجلد المحيط، دي إجراءات جراحية صغيرة، لكنها محتاجة عين مدربة لأن المليمترات هنا بتفرق
الليزر الجزئي عندو مكان برضو، Fractional CO2 فعال جداً في الندوب لأنه يحفز إعادة بناء قوية، بس في البشرة الداكنة خطر التصبغ أعلى، فقيمته هنا أقل، وبحتاج تحضير ومتابعة،برضو ال Erbium:YAG fractional ألطف شوية وأكثر أماناً نسبياً، أما non-ablative fractional، زي Fraxel Dual، فهو غالباً أأمن للبشرة الداكنة لأنو ما بقشر السطح بنفس العنف، بس نتائجو أبطأ وبتحتاج جلسات أكثر
وفي نوع آخر من الندوب أكثر شيوعاً في البشرة الداكنة، وعلاجو مختلف تماماً: الندوب المتضخمة والجدراء، وده موضوع المنشور الجاي
#حكاية_حب_الشباب #عيادات_بيت_العافية #عيادة_الجلدية_أون_لاين