في الجلدية، في قاعدة ذهبية كل طبيب بتعلمها من أول يوم: إذا شفت احمرار فده بيعني انو في التهاب، الاحمرار (erythema) هو "جرس الإنذار" البقول للطبيب إنو في حاجة غلط تحت الجلد - عدوى، حساسية، تهيج، أي شيء، العين بتشوف الأحمر، والعقل بمشي طوالي للتشخيص
القاعدة دي بتشتغل كويس في البشرة الفاتحة، لكن في بشرة أطفالنا - البشرة الداكنة، الجرس ده ممكن يكون مكتوم، وده لأنو صبغة الميلانين (melanin) البتدي بشرتنا لونها الجميل، هي نفسها بتمتص الأطوال الموجية للضوء البخلي الالتهاب يظهر أحمر، وبكده الالتهاب بكون موجود - نفس الالتهاب بنفس الشدة - لكن العين ما بتشوفو بالصورة "الكلاسيكية" البدرسوها في الكتب
في بشرتنا الالتهاب بتكلم بلغة تانية: لون بنفسجي (violaceous) أو رمادي غامق (ashen grey) أو مجرد اسمرار زائد في المنطقة المصابة، وأحياناً ما بكون في تغير لون ظاهر - الجلد شكلو عادي بس لمن تلمسو بتحس بيهو خشن أو ساخن أو متورم
خدوا الإكزيما كمثال - أشهر مرض جلدي مزمن عند الأطفال، الكتب الطبية بتقول: "بقع حمرة متقشرة في ثنيات الكوع والركبة"، لكن الطفل السوداني بجي بحبوب صغيرة حول بصيلات الشعر (follicular pattern) على الذراعين والساقين من بره - ما في الثنيات، والجلد ببقى سميك وخشن (lichenification) ولونو غامق، يعني صورة ما حتتلقي بسهولة في الكتب المشهورة
كده ممكن الطبيب يقلل من شدة المرض عشان ما شاف "الاحمرار" - فيدي علاج أضعف من اللازم - الحالة ما بتتحسن - الطفل بيتأخر - التصبغ بعد الالتهاب (post-inflammatory hyperpigmentation) يزيد - والحكة المستمرة تسرق نومو وتركيزو وراحتو
هسي، القاعدة العملية البتفيد كل أم وأب: ما تعتمدوا على عيونكم بس، اتحسسوا جلد طفلكم بأيديكم، الخشونة بتعني إنو في التهاب حتى لو اللون ما اتغير، الحرارة الزائدة في منطقة معينة بتعني إنو في التهاب تحتها، التورم الخفيف البتحسوا بيهو بأصابعكم بيعني إنو في حاجة بتحصل جوا الجلد
في البشرة الداكنة، الأيد بتشخص أحسن من العين، وده ما كلام للأهل بس، للأطباء كمان، عشان بشرة الطفل تتكلم معاهو باللغة البتعرفها بدون إساءة فهم، والسلسلة دي حتعلمنا اللغة دي - كلنا - أهل وأطباء
حنبدأ من بكره بأول صفحة في السبورة - أول يوم بعد ولادة الطفل، يوم قد يظهر عليهو فيهو "طفح" بخلع أي أم، طفح عادي ولا خطير؟ وكيف نفرق؟ دي حكاية البوست الجاي
#حكاية_جلد_الصغار
#عيادات_بيت_العافية
#عيادة_الجلدية_أون_لاين