في أول أيام بعد الولادة، كتير من الأمهات بلاحظن حبوب صغيرة بيضاء أو مصفرة على وش المولود، خصوصاً على الأنف والخدود والجبهة، شكلها مرتب وصغير، كأنها حبات لؤلؤ تحت الجلد، وده بخلي البعض يفتكرها دهون، أو حساسية، أو حبوب محتاجة تنظيف
الحالة دي اسمها الدخينات اللبنية، أو Milia، هي ببساطة أكياس سطحية صغيرة جداً مليانة كيراتين، والكيراتين ده مادة طبيعية من مكونات الجلد، يعني ما صديد، وما عدوى، وما دهون وسخة، وما نتيجة قلة نظافة، هي جزء من تأقلم جلد المولود الجديد
غالباً بتظهر من الولادة أو خلال الأيام الأولى، وحجمها صغير جداً، حوالي 1–2 ملم، لونها أبيض أو أبيض مصفر، وحولها ما في احمرار واضح، وما بتسبب ألم أو حكة، والطفل بيكون طبيعي تماماً: بيرضع، صاحي، وما عندو حرارة
أشهر أماكنها الأنف، الخدود، الجبهة، وأحياناً الذقن، وممكن تظهر في الفم كحبيبات صغيرة على اللثة أو سقف الحلق، ودي برضو غالباً سليمة وعابرة،العلاج برضو صفر علاج، ما نعصرها، ما نفتحها بإبرة، ما نمسح عليها كورتيزون، ما نستخدم مضاد حيوي، ما نعمل تقشير، وما نكثر كريمات على وش المولود
الدخينات بتختفي براها خلال أسابيع، أحياناً خلال شهر أو شهرين، بدون أي أثر وبدون تصبغ دائم، التدخل فيها ممكن يهيج جلد الطفل، أو يسبب التهاب، أو يفتح باب لمشكلة ما كانت موجودة، لكن المهم نفرقها من الحبوب المصحوبة باحمرار واضح، أو إفرازات، أو تورم، أو حرارة، أو من أي طفح جاي مع خمول أو رفض رضاعة، هنا ما بنقول “دي دخينات” ساكت، لازم الطفل يتقيم
في البوست الجاي حنمشي لطفح شائع جداً في بلادنا الحارة، بيزيد مع اللف والحر والعرق، وبيظهر كحبيبات صغيرة في الرأس والرقبة وثنيات الجلد: الطفح الحراري (حمو النيل)
#حكاية_جلد_الصغار
#عيادات_بيت_العافية
#عيادة_الجلدية_أون_لاين