كلمة «شعري خفيف» من أكتر الكلمات البتفتح باب لخبطة كبير، لأنها كلمة واحدة، لكن ممكن تكون وراها أربع حاجات مختلفة تماماً، ممكن تعني إنو الفراغات بقت ظاهرة، أو إنو الشعرة ذاتها رفيعة، أو إنو الشعر ما بدي امتلاء في التسريحة، وأخيرا ممكن ببساطة زولة تقارن شعرها بأختها أو صحبتها وتظلم نفسها من غير ما تعرف هي بتقارن شنو بشنو.
عشان كده قبل ما نقول الشعر خف أو ما خف، لازم نسأل: خفيف بمعنى شنو؟
أول معنى هو كثافة البصيلات (follicular density)، يعني عدد البصيلات في مساحة معينة من الفروة، كم بصيلة تقريباً في السنتيمتر المربع، دي زي عدد البيوت في الحلة، في زول مولود بعدد بصيلات أعلى، وزول بعدد أقل، وده جزء كبير منو جيني وما معناه مرض.
المعنى التاني هو سُمك الشعرة الواحدة (hair diameter)، يعني الشعرة ذاتها ناعمة ورفيعة ولا سميكة وخشنة، ممكن زولتين عندهم نفس عدد البصيلات تقريباً، لكن واحدة شعرتها سميكة فتدي إحساس غزارة أكتر، والتانية شعرتها رفيعة فتدي إحساس أخف، مع إنو عدد الشعرات ما بالضرورة أقل، وعشان تقيمي سُمك شعرتك براك ببساطة، شيلي شعرة واحدة وافركيها بين أصابعك؛ لو حسيتي بيها واضحة وملمسها قوي، دي شعرة سميكة، ولو كانت بالكاد محسوسة أو بتشبه خيط العنكبوت، دي شعرة رفيعة وناعمة.
المعنى التالت هو عدد الشعرات الطالعة من الوحدة الجرابية (follicular unit)، لأن البصيلة ما دايماً بتطلع شعرة واحدة بس، في وحدات ممكن تطلع شعرة واحدة، وفي وحدات تطلع اتنين أو تلاتة أو أربعة، ولمن عدد الوحدات يتعدد، الشعر بظهر أغزر، ولمن الوحدات الأحادية تكون أكتر، المظهر ممكن يكون أخف حتى لو الفروة ما فيها مرض ولا تساقط.
المعنى الرابع هو الامتلاء البصري (visual fullness)، وده أكتر معنى بخدع العين، لأنه ما بعتمد على العدد والسُمك بس، وإنما كمان على طول الشعر، والكيرلة، والانكماش، والتسريحة، واللون، والضوء، وهل الشعر مفرود ولا طبيعي، وهل الأطراف متكسرة ولا محفوظة. الشعر الكيرلي ممكن يدي امتلاء كبير بسبب اللفة، لكن برضو ممكن الانكماش يخلي الطول ما ظاهر، والشعر المستقيم ممكن يوضح الفروة أسرع لو الشعرة رفيعة أو اللون متقارب مع لون الجلد.
عشان كده «شعري خفيف» ما جملة كفاية للتشخيص، محتاجين نفكها: هل الفروة بقت أوسع من قبل؟ هل فرق الشعر اتوسع؟ هل في منطقة معينة زي التاج أو المقدمة بقت أوضح؟ هل الشعر البقع من الجذر زاد؟ ولا المشكلة إنو الأطراف بتتكسر فالشعر ما بدي امتلاء في النهاية؟ ولا شعرك من زمان طبيعته رفيعة وناعم، لكن المقارنة مع شعر أكتر كثافة خلتك تحسي إنو في مشكلة؟
في الدراسات الكبيرة على اختلاف الشعر بين المجموعات البشرية، زي بيانات لوسوران (Loussouarn) على ٢٤ مجموعة عرقية، الشعر الأفريقي في المتوسط بميل لكثافة عددية أقل وشعرة أرفع، حوالي ٥٥ ميكرون في بعض القياسات مقارنة بـ ٧٠ ميكرون أو أكتر في أنماط تانية، ومعاهو تفاوت أكبر في السُمك على طول ساق الشعرة الواحدة، لكن السر الهندسي المثير هنا إنو مقطع الشعرة الأفريقية تحت الميكروسكوب هو مقطع إهليلجي مفلطح (Elliptical cross-section)، وده مع الالتفافات الكيرلية هو البيدي الشعر الأفريقي «امتلاء وحجم هائل (Volume) بيعوض نقص الكثافة العددية
وكلمة «في المتوسط» هنا مهمة جداً، لأنها ما حكم على أي زولة بعينها، السودان بالذات طيف واسع، وفي الأسرة الواحدة ممكن تلقى اختلاف كبير في السُمك والكثافة واللفة.
وبرضو لازم نفرق علمياً وإكلينيكياً بين شعر «خفيف من البداية» وشعر «بخف مع الزمن». الشعر الخفيف من البداية هو شعر نهائي سليم لكن قطرو صغير (Terminal fine hair)، أما لو الشعر كان سميك وبدأ يرفع بالتدريج، هنا بندخل في عملية اسمها «التصغير البصيلي (Follicular Miniaturization)، ودي ظاهرة بتخلي البصيلة تصغر مع الوقت وتنتج شعرة أرفع وأقصر في كل دورة نمو لحدي ما تتحول لشعرة خفيفة بتشبه وبر الخوخ (Vellus-like).
التصغير ده هو العلامة الأساسية في الصلع الوراثي والتساقط الهرموني، وعشان كده لو كان الفرق جديد، أو في تساقط واضح، أو فراغات، أو ألم وحكة وقشرة شديدة، أو مقدمة الشعر بتتراجع، هنا ما نقعد نطمن نفسنا ساي، بنسأل عن التساقط والتكسر والشد والغدة والحديد والولادة والأدوية، لكن لو الشعر من زمان رفيع والكثافة ثابتة، المشكلة غالباً بس في توقعاتنا وفي طريقة العناية الممكن تبرز أحسن ما فيه.
والبيئة والتلف بيدخلوا في الصورة، لو شعرتك رفيعة، ابعدي تماماً من الزيوت والكريمات التقيلة على الفروة والجذور لأنها بتلصق الشعر في الفروة وبتكشفها زيادة، واعتمدي على مرطبات خفيفة للأطراف بس، وفي التسريح، اختاري تسريحات بتدي إحساس بالحجم (مثلا twist-outs) بدل الشد القوي لورا البيوضح أي فراغ وبيجهد البصيلة.
الهدف من الكلام ده ما نقول ليك اتقبلي أي تغيير وخلاص، وإنما إننا نسمي الحاجة باسمها، لأن الكثافة غير السُمك، والسُمك غير الامتلاء، والتكسر غير التساقط، ولمن الاسم يكون واضح، الطريق بعدو بكون أوضح.
في الحلقة الجاية حنمشي لسؤال قريب جداً من ده: هل خصائص شعرك ثابتة؟ وليه ممكن شعر القفا يختلف من مقدمة الرأس، أو شعرك يتغير بعد البلوغ أو الحمل أو مع العمر؟
#حكاية_الشعر #عيادات_بيت_العافية #عيادة_الجلدية_أون_لاين