بعد البوست عن مسامية الشعر وطرق الترطيب، جاني سؤال مهم شديد وفي محلو: يعني شنو أصلاً كريم مائي خفيف، ونلقاهو وين في سوقنا السوداني؟
الفكرة ببساطة إنو الكريم ده وظيفتو يدي الشعرة الموية البتحتاجها عشان تلين قبل ما نقفل عليها بالزيت، وعشان كده لو مسكتي أي علبة وقلبتيها على ورا وقريتي المكونات، لازم أول كلمة تقع عليها عينك تكون (Aqua) أو ماء،
في صيدلياتنا ودكاكينا الخيارات كتيرة وبسيطة، أقربها وأسهلها المنتجات البتتباع باسم "بديل الزيت" زي بانتين أو صانسيلك، دي كلها في الحقيقة عبارة عن كريمات مائية قوامها خفيف وممتازة كخطوة ترطيب سريعة،
كمان كريمات التصفيف اليومية الخفيفة زي فاتيكا وباراشوت بيعتبروا خيارات مألوفة وناجحة جداً، وفي الفترة الأخيرة ظهرت منتجات محلية بتتباع تحت اسم "حليب الشعر" أو كريمات "الليف إن"، ودي مصممة خصيصاً عشان تديك الترطيب المائي ده من غير ما تلبد الشعر أو تخليهو مزيت وتقيل،
المرة الجاية لما تمشي تشتري، ما تشتغلي بالاسم التجاري المكتوب بالبنط العريض قدام، لفي العلبة واقري المكونات، لو لقيتي الموية في الصدارة، والقوام خفيف بتوزع في اليد وبنزلق بسهولة، طوالي اعرفي إنك مسكتي الكريم المائي المناسب البجهز شعرك لخطوة الختم بالزيت،
#حكاية_الشعر #عيادات_بيت_العافية #عيادة_الجلدية_أون_لاين