عطفا على البوست السابق (١)
وعشان نعرف أهمية التفكير العلمي الاحصائي في حياتنا اليومية، وأهمية الدراسات الوبائية العادية، وانو الفحوصات ما هي كل حاجه في التشخيص
فلنفترض انو حساسية* ودقة** فحص طبي معين هي ٩٥٪ ، ودي قيم تعتبر عالية في الفحوصات الطبية، وكتير منها بكون أقل من كده (حساسية فحص الملاريا بالأجسام المضادة مثلا بتساوي ٩٠٪)
طيب السؤال هو:
لو عملنا الفحص الحساسيتو ودقتو ٩٥٪ ده لزول انا شاكي انو عندو المرض، وطلعت النتيجة موجبة فعلا، فهل ده بيعني انو إحتمال اصابتو بالمرض هي ٩٥٪؟
والاجابة الصحيحة هي لا!
وللأسف كتار ما منتبهين للحاجه دي حتي في المجال الطبي!
لأن الاحتمال الأول بتاع حساسية الفحص ودقتو متعلقة بإحتمال ايجابية الفحص مع افتراض وجود المرض، بينما الاحتمال التاني البهمنا طبيا هو احتمال الاصابة بالمرض مع وجود إيجابية الفحص! وديل احتمالين مختلفين تماما!
احتمال الاصابة بالمرض مع وجود ايجابية الفحص بتعتمد على مدى انتشار المرض في المجتمع prevalence، وده هو البنسميهو في الاحصاء ال Bayesinan بالاحتمال القبلي prior probability
( اتذكروا اننا قلنا في المنشور الفات اننا محتاجين لنوع تاني من التعليل الاحصائي لحساب الاحتمال العكسي inverse probability)
وفي معادلة (٢) بنقدر نطلع بيها الاحتمال المفيد طبيا (إحتمال الاصابة بالمرض مع وجود إيجابية الفحص) وبنسميها القيمة التنبؤية الموجبة positive predictive value
وكمثال؛ لو كانت نسبة إنتشار المرض في المجتمع هي ١٪، فإن احتمال الاصابة بالمرض لو طلع الفحص ده موجب هي ١.٨٪ فقط!
أما لو كانت نسبة انتشار المرض في المجتمع هي ٥٠٪ فهنا ببقى احتمال الاصابة بالمرض لو طلع الفحص موجب هي ٩٥٪
وأخيرا لو كانت نسبة إنتشار المرض في المجتمع هي ٩٠٪، فهنا ببقى إحتمال الإصابة بالمرض لو طلع الفحص موجب هي ٩٩٪
وهكذا سيداتي سادتي
مهم جدا جدا
واستيعابو حيأثر في صحتكم بشكل مباشر 😁
هامش:
* أي فحص طبي بكون عندو قيمة معينة بنسميها حساسيتو sensitivity، وهي ببساطة؛ لو في ١٠٠ زول مصاب بمرض معين، الفحص حيطلع موجب في كم زول منهم؟ النسبة دي هي حساسية الفحص
**أي فحص طبي عندو قيمة تانية بنسميها دقتو specificity ، وهي ببساطة؛ لو في ١٠٠ زول ما مصاب بمرض معين، الفحص حيطلع سالب في كم زول فيهم؟ النسبة دي هي دقة الفحص
المراجع:
(١)