كان عندي بعض المخاوف حول الاستشارات الاون لاين رغم معرفتي بمدى كفاءة طب الجلدية عن بعد Teledermatology عبر دراستي للماجستير في علوم الحاسوب
وهي مبرره بمدى توفر البنية التحتية من انترنت قوي مستقر عند المراجعين وعندي (حتتحل من طرفي بالانترنت الفايبر من سوداني)، وبمهمة صياغة بروتوكول مناسب لشكل الممارسة في منطقتنا مع عدم معرفتي بتجارب سابقة في السودان او المنطقة
لكن تأتي الآيات أحيانا لتشرح الصدر تجاه النوايا؛ قبل قليل عملت استشارة غير مخططة مع مراجع بره السودان عبر المسنجر نظرا لضيقه الشديد من مرضه، وكانت نموذج للعايز اعملو:
توفير معلومات وحلول متكاملة لمشاكل مزمنة مع وضع خطة مناسبة حسب ظروف كل شخص ومكانه، واستأذنتو انشر المقطعين ديل لأنهم ألهموني أجتهد في التخطيط والتنفيذ للتطبب عن بعد
لكن لسه خايف من مشكلة عدم توفر العلاج بره السودان في الغالب إلا بوصفة طبية محلية، والاحتياج أحيانا لعمل عينة جلدية او اخذ صورة بالديرمسكوب او عملية كي بالبرد Cryotherapy وما شابه من إجراءات تحتاج الحضور الشخصي للمريض
المشكلة دي حتكون محلولة لناس الخرطوم نظرا لأني بعد رمضان حأسعى للتعاقد مع عيادة مجهزة أشوف فيها البحتاجو المقابلة الشخصية، بحيث أسافر ليهم مرة كل ١٠ أيام او اسبوعين مثلا، وبفكر ان الحالات الما بقدر اشوفها سواء بره الخرطوم أو السودان، تكون بمثابة جلسة مبدئية توجيهية لحين التمكن من إكمال متطلبات العلاج وطبعا برسوم اقل
كان بودي انها تكون خدمة مجانية لكن استقراري في السودان بصنع تعقيدات حتطيح بالاستمرارية حتما في ظل الظروف الصعبة العايشينها دي 😅
دعواتكم واقتراحاتكم يا أحباب ❤️
عيادات بيت العافية
