تجربتي مع إستعمال الواتس اب بزنس بالعيادة
لما بديت خدمة العيادة الأون لاين للجلدية Teledermatology ببداية مارس ٢٠٢٢ *، كنت بتلمس يدوب طرق تقديم خدمة مجودة بطريقة جديدة بالسودان، وكان درب طويل من التطوير والتعب لحدي ما استقرت بشكل كويس
شفت ما يفوق الألف مريض حتى الآن، من داخل وخارج السودان، الغالبية العظمى سودانيين وفيهم الجنسيات العربية وبعض الأجانب، وده منح الخدمة بعد واسع، شفت فيهو ناس من أصقاع السودان القصية، ومن أمريكا للنرويج لأستراليا لجنوب افريقيا وما بينهم 😁
لاحقا وسعت من مفهوم إستعمال التطبب عن بعد، عشان تبقى برضو وسيلة للمتابعة للمرضى الحضوريين برضو، لأن الأمراض الجلدية متابعاتها عادة طويلة، وفي كثير من الأحيان ما بكون في حوجة حقيقية للكشف الحضوري مجددا
فبقيت أديهم رقم الواتس اب، عشان الاستفسارات الصغيرة من شاكلة يدوني تحديثات لتطور المرض، صور للعلاجات وسؤال عنها، معالجة الاعراض الجانبية ليها، تعديلات بالخطة العلاجية، توجيه بالاستمرار في العلاج حال التحسن، إلخ
وبكده حليت مشكلة تانية، لأنو نظام المتابعة بالعيادات بمدني، بتكون فيهو المقابلة مجانية خلال اسبوع او اسبوعين ثم نصف القيمة لشهر ثم القيمة كاملة بعد كده، بينما الأمراض الجلدية عادة متابعاتها مطولة بتفوق الشهر؛ فلما ما يكون في حوجة لإعادة التقييم وعمل خطة علاجية جديدة، بكتفي بالرد عليهم في الواتس لحين التعافي وعمل التعديلات البسيطة، وده أريح ليهم ولي، بحيث أركز في العيادة الحضورية على الحالات الجديدة والعمليات وإعادة التقييم
طبعا في مشاكل وسلبيات؛ أهمها هو أن مجهود تقييم صلاحية الاستشارة للعلاج عن بعد والمتابعة والرد المتواصل مرهق، ولو خليتو كم ساعة حتتراكم علي الرسائل، وإنو مرات الناس بتتعامل معاهو كطبيب مجاني متوفر فترسل شكاوى للآخرين متوقعين معاها رد سريع (ودي طبعا ما طريقتي زي ما وضحت قبال كده**) وعملية التنسيق بين قبول الاستشارة والحجز، ومشاكل الاتصال والمواعيد وإعادة الجدولة، وغيرها من المشاكل التقنية
لكن مع كل التعب ده، بتجي الرسائل اللطيفة والامتنان من مرضاي، عشان يغسلوا الرهق ويخففوا عني سخف المنغصات المختلفة، والإحساس بأني نجحت في تقديم نموذج جيد للتطبب عن بعد في الجلدية، وإنو محاسن التجربة حتى الآن تفوق مساوئها كما آمل
ملحوظة:
واتس اب العيادة الاون لاين 0992502360
https://wa.me/message/GZQ7GZDYC57BD1
*https://m.
** https://m.