هل الطب ساهل ممكن أي زول بالمجال الطبي يمارسوا؟ تشخيصا وعلاجا دون كثير إنتباه؟
لما تجيك نفس الروشتات بالصيدلية لنفس الاعراض، او تشوف نفس الفحوصات بالمعمل لنفس الاعراض، او تشوف نفس النتائج الكويسة لقشر الرمان لنفس الاعراض بكل الاخدوهو، هل ده ببرر انو تعالج نفسك وغيرك بثقة كافية؟
لو الأمر بالسهولة دي ما كانت قراية الطب وممارستو أمر بالصعوبة دي للتأهل فيهو وتحمل مسؤوليتو
صحي اغلب الأمراض الشائعة بسيطة وسهله في التشخيص والعلاج زي الزكمة والملاريا وحمو النيل إلخ، بل ٩٠٪ من الأمراض اللي بتجي لمراكز الخدمة الطبية هي من النوع المتكرر ده، عشان كده في مساعدين طبيين ممكن يسدوا خدمة التشخيص والعلاج بمختلف التخصصات بدون مشقة وممكن قريبك المهندس يديك علاج للزكمة ينفعك
لكن البخفى عن الناس انو الطبيب والاخصائي، مهمتم موش الشغل الروتيني ده، بل:
١/ الانتباه لل ١٠٪ من الحالات اللي بتجي بمظهر مرض عادي بينما هي حاجه تانية خالص، ومرات بتكون أمراض خطيرة وقاتلة
مثلا ممكن تشوف إكزيما عادية وهي في الحقيقة سرطان لمفاوي في الجلد وده صعب حتى للاخصائي انو يشخصو صاح من أول مرة
٢/ متابعه الجديد في التشخيص والعلاج مع تغير المعرفة الطبية والأبحاث الجديدة، زي التغيرات اللي بتحصل في طرق تشخيص ومعالجة الملاريا وضغط الدم والسكري والصرع وغيرها من الأمراض الشائعة
٣/ مراكمة خبرة عبر العمل اليومي للتمييز بين الأمراض وطرق الاستجابة ومعرفة الخيارات غير الشائعة للحالات غير المستجيبة لخطوط العلاج الاولى المعروفة وتقدير تدي شنو وكيف للحالة
٤/ إضافة الجديد عبر الملاحظة والبحث العلمي ومعرفة البيئة اللي بتنتشر فيها الامراض، يعني في وقت معين ممكن اعراض تشير لحمى ضنك مثلا لما يكون عندك معلومة انتشارها الوبائي او شوف لتزايد الحالات البتصلك، بينما ممكن زول ما متابع يعتبرها حمى عادية ويعالجها كملاريا عادية
السوء العايشين فيهو اسي بالسودان او حتى حالة الطب بالعالم كلو على اختلاف التجويد والاهمال، ما بتبرر انو الناس تجيها ثقة زائفة بممارسة الطب بإهمال على روحهم وعلي الناس بلا توقف وانتباه لحدود معرفتهم ودورهم وتأهيلهم، ما ممكن يبقي الاستثنائي والطاريء الجاي من السوء العام للتأهيل والنظام هو الصاح والعادي 🤷
الردود في بوستي عن الصيدلي الغير تشخيصي بلا معرفة من ناس مفترض بيهم التعليم كانت مدهشة لي صراحة وبتشي بالتصالح مع سوء الممارسة