صورة الدم ممكن تطلع طبيعية، ومخزون الحديد يكون قاعد ينقص بهدوء، الجسم بحاول يحافظ على الهيموغلوبين أطول فترة ممكنة، وبيسحب الحديد من المخزون قبال ما يظهر فقر الدم بوضوح
الفيريتين (ferritin) بروتين بنستعمل مستواهو كمؤشر على مخزون الحديد، عشان كده الزولة ممكن يكون عندها نقص حديد من غير فقر دم، خصوصا في المراحل الأولى، الفيريتين برضو ممكن يرتفع وقت العدوى والالتهاب، فالنتيجة محتاجة تتقري مع القصة وبقية الفحوص
علاقة الحديد بالشعر موجودة، بس ما بسيطة، دراسات كتيرة لقت إن مخزون الحديد بكون أقل وسط نسوان عندهم فقدان شعر غير ندبي، مع اختلاف النتائج من دراسة للتانية، انخفاض الفيريتين ممكن يكون جزء من القصة، وما بفسر كل تساقط براهو
ودراسة محلية على مراهقين في شمال السودان لقت إن نقص الحديد كان أكتر وسط المجموعة العندها فقدان شعر، الدراسة شملت أنواع مختلفة من التساقط، وما بتمثل كل السودان، وبتدينا سبب عملي عشان ما ننسى مخزون الحديد لمن القصة تشير ليهو
أكتر المعرضات لنقص الحديد هن البعانوا من دورة غزيرة أو طويلة، وحمل وولادات متقاربة، ونزيف بعد الولادة، وأكل قليل أو رجيم قاسي، النزف من المعدة أو الأمعاء، ومشاكل الامتصاص، وبعض الطفيليات ممكن تستنزف المخزون برضو
التعب، والدوخة، والصداع، والخفقان، والنفس القصير مع المجهود، وضعف الأظافر ممكن يمشوا مع نقص الحديد، ومن العلامات المهمة اشتهاء التراب أو الطين، أو مضغ التلج بصورة مستمرة، ودي حالة اسمها البيكا (pica)، دراسة سودانية لقت إن البيكا كانت مرتبطة بنقص الحديد وفقر الدم وسط المراهقين، خصوصا البنات
لو التساقط منتشر ومعاهو قرائن لنقص الحديد، صورة الدم براها مرات ما بتكفي، الطبيب ممكن يطلب الفيريتين، ويضيف فحوص تانية حسب وجود التهاب، أو عدوى، أو مرض مزمن، الهدف نعرف هل المخزون ناقص فعلا، ونفتش السبب البخليهو ينقص
حبوب الحديد ما تبدأ بالتخمين لمجرد إن الشعر وقع، التعويض بحتاج جرعة ومدة مناسبتين، ومعاهو علاج السبب، علاج المخزون من غير وقف الفقد بخلي النقص يرجع، وزيادة الحديد عند زول مخزونو طبيعي ما بتسرع نمو الشعر
وبرضو انخفاض الفيريتين ما معناهو إنو السبب الوحيد للتساقط، ممكن يجتمع مع ثعلبة شد، أو ترقق وراثي، أو اضطراب غدة، أو تساقط كربي بعد مرض أو ولادة، التحليل بساعد التشخيص، والفحص هو البحدد وزن كل سبب، واالمستوى المفضل للفريتين هو أكثر من 50 لحدي 70
وفي الحلقة الجاية حنفتح رف «فيتامينات الشعر»، ونشوف فيتامين دال، والزنك، والبيوتين بفيدوا متين، ومتين حلاوة الشعر بتبيع لينا نقص ما موجود