البشرة الداكنة وعلامات الخطر

أكبر غلطة بتخلي الناس في المعسكرات وحتى بعض الكوادر الصحية ما ينتبهوا لعلامات السموم والحساسية بدري هي إنهم بفتشوا في جلد المعدّن على لون أحمر أو وردي زي المرسوم في كتب الطب الأجنبية، ولما ما يلقوا حمار واضح بقولوا الحمد لله الجلد سليم وما فيهو عوجة

الحقيقة العلمية البسيطة والأساسية في سلسلتنا دي هي إنو أغلب مراجع الجلدية والسموم في العالم اتكتبت واتصورت على بشرة بيضا فاتحة، بينما بشرتنا السودانية السمرا والداكنة عندها لغة تانية خالص بتتكلم بيها لما تتأذي أو تلتهب، فلو عندك زول في التعدين وعايز تقرأ عداد جلدو صح، لازم تتعلم تترجم العلامات دي للغة بشرتنا نحنا

في البشرة البيضا أي التهاب أو تهيج كيميائي بوسع الشعيرات الدموية تحت الجلد فيظهر طوالي بلون أحمر فاقع، لكن في بشرتنا الغنية بصبغة الميلانين الجميلة اللي بتحمينا من الشمس، طبقة الميلانين دي بتشتغل زي الفلتر الغامق فوق أوعية الدم، فاللون الأحمر تحتها ما بظهر أحمر للعين، بل بيتحول للون بني غامق كاتم، أو لون بنفسجي مايل للسواد، أو رمادي مطفي كأنو مكانو مضروب أو مكدوم

عشان كده في مرض مشهور في كتب الأطفال بيتسبب فيهو التسمم بالزئبق سموهو الخواجات المرض الوردي لأنو كفوف الشافع وقدمينو في البشرة البيضا بتبقى وردية، لكن عندنا في السودان الشافع المصاب بنفس الحالة دي كفوفو ما بتبقى وردية أبداً، بل بتكون غامقة ومورمة ومتقشرة وبتحكو بشدة

ونفس الشي لما نتكلم قدام عن علامات الزرنيخ أو عن الفطريات العادية في ضهر المعدّن وصدرو، حنلقى إنو البقع الفاتحة اللي بتشبه نقط المطر على الدرب الترابي بتكون أوضح للعين على بشرتنا الداكنة بمية مرة من البقع الغامقة، ومن هنا بنطلع بالقاعدة الذهبية لقراية العداد على الجلد السوداني، وهي إنو الإيد بتقرأ قبال العين، والملمس أصدق من اللون

يعني بدل ما تفتش على حمار ما حيظهر، مرر إبهامك على كفوف ولدك أو أخوك الرجع من الكرتة وشوف الملمس، لأنو الخشونة البتشبه ورق الصنفرة، والتقشر، والتشققات، والتورم، والحبيبات الصغيرة في الكفوف والأخمص هي العلامات البتتكلم بصوت عالي على بشرتنا قبال ما اللون يلفت الانتباه

ولو في يوم قريت اسم مرض أو علامة في السلسلة دي وحبيت تفتش على صورتها في قوقل عشان تطمن، أوعك تكتب الاسم الإنجليزي براهو لأنو قوقل حيطلع ليك صور بشرة بيضا تتوهك، دايماً أكتب جمب الاسم الإنجليزي كلمتين بالإنجليزي معناهم البشرة الداكنة، وهما dark skin، عشان تشوف العلامة زي ما بتظهر على جلد أهلنا بالضبط

ومع القاعدة دي لازم نخت حد واضح ومطمن للتحذير، تغير لون الجلد لغمقان بعد أي حبة أو خدش أو إكزيما بسيطة، أو ظهور بقع فاتحة بسبب فطريات العرق البسيطة، هي حاجات شائعة جداً وطبيعية في بشرتنا السودانية لأنو خلايا الصبغة عندنا نشيطة وبتتأثر بأي التهاب عابر، فوجود بقعة غامقة أو فاتحة براهو ما معناه تسمم بالمعادن أبداً، العداد بنقرأهو كامل بالملمس والتوزيع وقصة الشغل

ونبدأ بالحاجات البتحصل في الأسابيع الأولى، وأشهرها ما سم أصلاً.

⚕️ هذا المحتوى للتثقيف الصحي العام ولا يغني عن الاستشارة الطبية. لحالتك الخاصة يمكنك حجز استشارة بالعيادة.
استشارة عبر واتسابتابعنا على تلغرام