الحرق والإسعاف الأول

حالة شاب عشريني من واحد من معسكرات التعدين، عندو حرق كيميائي عميق ومؤلم شديد في يدو وساعدو ، والسبب ما كان طش الصودا الكاوية والجير براهم، بل كان التصرف الغلط العملوهو أصحابو في المعسكر بحسن نية في اللحظة ديك

لأنهم لما اتطرطش بالموية القلوية من حوض الكرتة جروا جابوا ليمون وخل وكبوهو فوق الجرح على أساس إنو الحامض بيعادل القلوي ويطفي الحريق، والنتيجة كانت إنو التفاعل الكيميائي حصل فوق جلد الولد وولع حرارة أكتر حفرت الجرح أعمق لأن ناتج تفاعل حمض مع قلوي هو حرارة بتطلع من التفاعل وتعمل حريق

لو عندك زول في التعدين لازم الرسالة دي تصلو الليلة قبال بكرة، لأنو الحروق الكيميائية في المعسكرات سواء كانت من الجير المطفي أو الصودا الكاوية أو محاليل السيانيد في الأحواض أو الأحماض القوية بتحصل في ثواني، والتصرف في الدقائق الأولى هو البيحدد هل الجلد حيطلع سليم ولا حيفضل فيهو أثر طول العمر

وعشان نفهم خطورة الجير والصودا الكاوية بالذات نرجع لاستعارة الحيطة والمونة، الأحماض العادية لما تقع على الجلد بتحرق الطبقة الفوق وتعمل قشرة ناشفة بتوقف تغلغل الحمض لجوا إلى حد ما، لكن المواد القلوية زي الصودا الكاوية والجير ومحلول السيانيد القلوي بتعمل حاجة أخطر بكتير، لأنها بتذوب المونة الدهنية وتذوب معاها طوب الخلايا نفسو وتعمل عملية تصبين في دهون الجلد، فتفضل تحفر لي جوا في اللحم بصمت لساعات طويلة طالما هي قاعدة على الجلد وما اتغسلت

عشان كده القاعدة الذهبية والوحيدة في الإسعاف الأولي لأي حرق كيميائي في المعسكر هي الموية الجارية الكتيرة وفوراً بدون تضييع ثانية واحدة، المعدّن أول ما تطش فيهو موية الحوض أو الجير أو الحمض لازم يشيل الهدوم أو القفاز أو البوت الملوث فوراً وهو تحت الموية، ويغسل المكان بموية نضيفة جارية لمدة ما تقل عن 15 لـ 20 دقيقة متواصلة بالتمام والكمال، وفي حالة الجير والصودا الكاوية الغسيل لازم يطول أكتر من عشرين دقيقة لحدي ما يروح الإحساس الصابوني الزلق من الجلد تماماً، ولو كان الجير بدرة ناشفة ينفضها من الجلد بفوطه ناشفة بالراحة الأول وبعدين يفتح عليها الموية بكثره

وإياكم ثم إياكم من خرافة المعادلة الكيميائية فوق الجلد، لا تختوا خل ولا ليمون ولا معجون أسنان ولا بن ولا دقيق ولا زيت، لأنو الحاجات دي بتحبس الكيماوي جوا الجلد وبتزود التهاب الأنسجة، أما لو الحصل ما حرق كيميائي بل زئبق سائل انكشح على الإيد أو الرجل، فده ما بيحرق الجلد في لحظتو لكن إسعافو السريع هو غسيل المكان بصابون عادي وموية نضيفة بهدوء عشان ننزل كريات الزئبق قبال ما تدخل في أي خدش صغير

وعلى بشرتنا السودانية السمرا والداكنة، الحرق الكيميائي في أولو ما بظهر بلون أحمر ناري زي البشرة البيضا، بل في حروق الصودا والجير الجلد بيبقى لونو رمادي باهت أو أبيض مطفي زي الممسح بصابون ناشف، وبعدها بيقلب للون بني غامق كاتم أو أسود بنفسجي مع تورم وتقشر

ولو الحرق عميق ممكن يسيب مكانو بقعة بيضا فاقدة للصبغة بعد ما يبرأ، وهنا لازم نفرق بوضوح بين الحرق الموضعي وبين الخطر الجهازي، لو طشة الكيماوي وخصوصاً موية السيانيد جا معاها صداع شديد أو دوخة أو ضيق في النفس أو تشوش في الوعي أو خفقان، دي علامات دخول السم للدم ودي حالة طوارئ قصوى مكانها أقرب مستشفى فوراً ما عيادة جلدية ولا انتظار في المعسكر

لكن الحاجه المطمنة جداً اللي لازم نختها في بالنا هو إنو أغلب الحروق الكيميائية الصغيرة والسطحية في المعسكرات لما تتغسل بموية جارية كتيرة في وقتها وتتغطى بضمادة نضيفة ومعقمة بتشفى تماماً في خلال أيام قليلة من غير مضاعفات، أما السيانيد بالذات فعندو طفح ليهو اسم حنشوفو المرة الجاية

⚕️ هذا المحتوى للتثقيف الصحي العام ولا يغني عن الاستشارة الطبية. لحالتك الخاصة يمكنك حجز استشارة بالعيادة.
استشارة عبر واتسابتابعنا على تلغرام