الخراج

الخدش الصغير البعملو الحجر المشرشر في إيد المعدّن أو الشوكة البتطعن رجلو وهو شغال في الطين، في بيئة المعسكر الملوثة ما بفضل خدش ساكت، بل كتير بيتحول لخراج مؤلم وبسخّن ويقعد الشاب من الشغل أيام، فلازم ننتبه للضيف التالت من ضيوف المعسكر وهو التهابات البكتيريا الحادة

لأنو البكتيريا العادية العايشة على جلدنا وفي التراب لما تلقى الحيطة الجلدية مفتوحة بسبب جرح صغير أو تشقق من إيد الطواحين أو حكة جرب، بتدخل فوراً لجوا اللحم وتتكاثر بسرعة، الالتهاب البكتيري ده في المعسكر بياخد شكلين

الشكل الأول إنو البكتيريا والصديد يتجمعوا في كيس مقفول تحت الجلد وده البنسميهو الخراج، وبيكون عامل زي الكورة المشدودة وبتوجع وجع شديد بنقح زي دق القلب، والشكل التاني الأخطر شوية هو إنو البكتيريا بدل ما تتجمع في حتة واحدة بتفرش وتمشي في الأنسجة تحت الجلد، وده البنسميهو التهاب الجلد الخلوي

والملاحظة المهمة في معسكراتنا هي إنو الجرح الصغير لما يكون ملوث بكيماويات الطواحين أو الجير أو السيانيد، مناعة الجلد الموضعية بتضعف والأنسجة بتتهري، فالجرح بيتأخر في التشافي، وبيكون مرتع ساهل للبكتيريا، وعشان الحمار بكون مخفي ورا السمار، الإيد بتقرأ هنا أصدق من العين، لما تلمس المكان بإيدك بتلقاهو سخن نار ومورم وناشف وبوجع مع أقل لمسة، وعلامة انتشار الالتهاب البكتيري بنعرفها لما مساحة السخانة والورم والغمقان تكبر وتمشي كل كم ساعة، أو تظهر خطوط غامقة ومؤلمة طالعة في الساعد أو الساق مع حمى ورجفة في الجسم

والرسالة المطمنة للأهل هي إنو أغلب الجروح الصغيرة في المعسكر ما بتتحول لخراج لو اتغسلت في ساعتها بموية نضيفة وصابون واتغطت بضمادة نضيفة تعزلها من الطين، وحتى لما يتكون خراج صغير ويستوي ويجمع صديد، علاجو الأساسي هو فتحو وتنضيفو بمشرط معقم عند الكادر الصحي وأبداً ما يتعصر بالإيد الملوثة في المعسكر لأنو العصر بيدفر البكتيريا لجوا الدم، أما المضاد الحيوي فبناخدو لما يكون في التهاب خلوي منتشر حول الجرح

وبننصح الشاب يتحرك للمستشفى فوراً بدون انتظار لما الورم والسخانة يمشوا بسرعة في الرجل أو الإيد، أو تجي معاهم حمى عالية وفتور، أو يكون الخراج في نص الوش أو في بطن الكف، وكل جرح في المعسكر بشفى في مدة معروفة، والما بشفى عندو سؤال

⚕️ هذا المحتوى للتثقيف الصحي العام ولا يغني عن الاستشارة الطبية. لحالتك الخاصة يمكنك حجز استشارة بالعيادة.
استشارة عبر واتسابتابعنا على تلغرام