ضيف الحروب

بالعيادة الأون لاين لاحظت الفترة الفاتت تزايد حالات الجرب مع سوء في التشخيص والعلاج بخلوا معاناة غير ضرورية تستمر لشهور مع توافر علاجات فعالة وسهولة التشخيص حين الانتباه للاحتمال، ده مقرونا مع اعلان وزارة الصحة السودانية الأخير حول الانتشار الوبائي ليهو في امدرمان واعتبار كثير من الناس ليهو كحمو نيل عادي أو اكزيما حفزني أكتب السلسلة القصيرة دي

الجرب (scabies) من أقدم الأمراض العرفت طريقها للبشر وهو عبارة عن وباء دوري بزور التجمعات البشرية كل كم سنة (تتراوح غالباً بين 7 إلى 15 سنة)، والتاريخ الطبي مليان بقصص انتشارو في ظروف الحرب، من خنادق الحرب العالمية لحدي معسكرات النزوح المكتظة في كل بقاع الأرض، وفي زمان السلم زي سنة 2013 لما أصيب أكثر من 100 عنصر من فوج الحرس الملكي البريطاني المسؤول عن حماية قصر وندسور بمرض الجرب، لانو الطفيل ده ما بفرق بين غني وفقير أو بين زول مهتم بنظافتو وزول مهمل، هو بس بفتش عن بيئة فيها زحمة وتلامس مستمر

الفكرة هنا انو الإصابة بالمرض في ظروف النزوح وشح الموية الحالية المضروبة بيها أم درمان ما عندها أي علاقة بانعدام النظافة الشخصية ولا هي دليل على الفقر أو القذارة زي ما الثقافة العامة بتربطا، فهو ضريبة مباشرة للظرف العام والزحمة وانعدام أبسط مقومات الحياة العادية الكنا متعودين عليها

المشكلة الكبيرة بتكمن في انو الوصمة التاريخية دي بتمنع المريض من انو يلاحظ لاحتمال الإصابة بالمرض أو حتى أحيانا طلب العلاج بدري وبخليهو يكتم المرض في نفسو ويحاول يعالجو بطرق بدائية أو أعشاب ما بتجيب نتيجة، ولحدي ما يتشجع ويمشي للطبيب بكون الطفيل أخد راحتو وعدى كل الناس الحوالينو في نفس البيت

الطفيل المسبب للمرض ده كائن دقيق جدا بحب الدفء وبعيش في الطبقة السطحية من الجلد وبتكاثر لمن يلقى بيئة مناسبة، وعشان نقدر نكافحو لازم أول حاجة نكسر حاجز الخجل والخوف من كلام الناس ونعترف انو دي عدوى طبية عادية جدا بتتعالج ببروتوكول واضح ومجرب

وفي الحلقة الجاية حنشوف كيف الطفيل الكسول ده بقدر ينتقل وليه هو ما بطير في الهواء زي فيروس النزلة

⚕️ هذا المحتوى للتثقيف الصحي العام ولا يغني عن الاستشارة الطبية. لحالتك الخاصة يمكنك حجز استشارة بالعيادة.
استشارة عبر واتسابتابعنا على تلغرام