
التونر خُلق في الأصل عشان يعدّل أثر الصابون بعد الغسيل
زمان الصابون كان قلوي وقاسي شديد وبخلي الغلالة الحمضية حقت الجلد ملخبطة وتعبانة، فكان التونر هو الخطوة البترجع الحموضة لطبيعتها وتجهز التربة للري، لكن الليلة مع الغسولات اللطيفة المتاحة الحاجة للوظيفة دي قلت، والجلد بقى يقدر يرجع توازنو براهو من غير مساعدة خارجية
عشان كده لمن تمسكي قزازة التونر الليلة مفروض تسأليها سؤال واحد، شغلتك شنو في روتيني، التونرات الموجودة في السوق أسي بتتقسم لتلاتة وظائف أساسية ما بتشبه بعض، ولازم تعرفي إنتي بتختي ياتو واحد في حواشتك:
النوع الأول هو تونر الترطيب، وده بكون خفيف ومليان شفاطات للموية زي الجلسرين عشان يدي الجلد رية سريعة قبال المرطب الأساسي
النوع التاني هو التونر المقشر، وده بكون فيهو أحماض زي حمض الساليسيليك أو الجليكوليك، وهنا ده ما بنعتبرو خطوة تنضيف تمسحي بيها بقايا المكياج، ده سماد ومادة فعالة كاملة الدسم، يعني بتعامل معاملة المقشرات وبحتاج حذر وبداية هادية عشان ما يحرق الزرعة ويجيب تصبغ
النوع التالت هو التونر القابض للمسام، وده في العادة بكون مليان كحول، وبدي إحساس إنو الوش مشدود ونضيف وخالي من أي نقطة زيت، لكنو في الحقيقة بشيل المونة والدهون الطبيعية البتحمي الحاجز الجلدي، وبنشفو بطريقة بتخلي الغدد الدهنية تفرز زيت زيادة كرد فعل عكسي، عشان كده بننصح بتجنبو في روتين بشرتنا الداكنة البتتهيج بسرعة
في نفس الرف بتلقي منتج اسمو الإسنس (Essence)، وهو خطوة جاتنا من الروتين الكوري، بكون أتقل شوية من التونر وأخف من السيروم، ووظيفتو الأساسية إضافة طبقة ترطيب وتلطيف للجلد، لكنو ما خطوة إجبارية، ولو روتينك فيهو مرطب مناسب لحوضك بكون كافي شديد من غير ما تدخلي في تعقيد الطبقات الكتيرة
أما موية الورد البتعتبر من أشهر الإضافات في بيوتنا، فتقييمها الصادق إنها بتدي إحساس منعش وريحة لطيفة بتحسن المزاج، لكن الأدلة الطبية على إنها بتعالج مشكلة معينة في الجلد محدودة شديد، والمهم ننتبه إنو العطر الطبيعي الفيها ممكن يكون زناد للحساسية عند بعض الناس البتتهيج بشرتهم بسرعة، فلو وشك مرتاح معاها استمري فيها كإضافة لطيفة، ولو حسيتي بلسعة أو احمرار وقفيها طوالي
وفي الحلقة الجاية حنمسك السيرومات ونشوف ليه القاعدة الحاملة للمادة الفعالة بتشكل فرق كبير في النتيجة
