القسم الخامس: المواد الفعالة شنو جوه القزازة (٢ من ١١) - الريتينويدات (١): العيلة كلها

«يا دكتور، أشتري سيروم ريتينول، ولا أجيب كريم أكرتين أو ديفرين من الصيدلية؟»

الأسماء دي كلها أولاد عم في عائلة كبيرة اسمها الريتينويدات (Retinoids)، وهي مشتقات فيتامين أ، وبتعتبر من أقوى وأقدم أنواع السماد العلاجي العليها دليل راسخ في طب الجلد، العائلة دي بتشتغل في كذا جبهة في نفس الوقت: بتنظم تقشر الخلايا عشان ما تسد المسام وتعمل حبوب، وبتحفز مصنع الكولاجين في الأدمة لتحسين الملمس والخطوط، وبتساعد في توزيع الميلانين وتخفيف البقع

وعشان ما تتلخبطي وسط القزازات والأنابيب، السر كلو في فهم «سلّم الريتينويدات»، لأن خلايا الجلد ما بتعرف تتعامل إلا مع الصيغة الفعالة النهائية وهي حمض الريتينويك (Retinoic acid)، أي مركب تاني بتمسحيهو لازم الجلد يحولو بنفسو خطوة بخطوة لحدي ما يصل للصيغة الفعالة دي، وكل ما كترت خطوات التحويل، بقى المنتج أهدأ وأبطأ وأقل تهييجاً للحاجز

في أول السلم من تحت بنلقى إسترات الريتينول (Retinyl esters) زي ريتينيل بالميتات، ودي أضعف وألطف درجة وبتحتاج تلاتة خطوات تحويل جوه الجلد، فبتنفع للوش الحساس شديد لكن أثرها العلاجي متواضع

فوقها بدرجة بيجي الريتينول (Retinol) المشهور في سيرومات وكريمات التجميل، وده بيحتاج خطوتين تحويل، وفوقو بيجي الريتينال (Retinaldehyde) البيحتاج خطوة تحويل واحدة بس لحدي ما يبقى فعال، دي كلها منتجات بتتباع في الرف من غير روشتة، وبنحتاج نقارنها بوعي لأن المقارنات المباشرة الدقيقة بين تراكيزها المختلفة في البشر لسه محدودة

لما نطلع فوق السلم، بنلقى المواد الجاهزة للشغل طوالي من غير تحويل، وعلى راسها التريتينوين (Tretinoin) وده حمض الريتينويك الصافي، ومعاهو التازاروتين (Tazarotene)، وديل أدوية قوية بوصفة طبية بتدي نتيجة أسرع وأوضح، لكن احتمال تهييجها للجلد أعلى بكتير لو استُعملت من غير تدرج

وبين الرف والروشتة بيقيف الأدابالين (Adapalene)، وده ريتينويد من جيل أحدث مصمم يشتغل بانتقائية على مستقبلات معينة في الجلد، فبيدي فعالية ممتازة في علاج الحبوب وتنظيم المسام بقدر أقل من التهيج مقارنة بالتريتينوين، الأدابالين بتركيز 0،1% اتجاز في أمريكا من يوليو ٢٠١٦ كأول مادة فعالة جديدة للحبوب تتباع من غير وصفة طبية منذ الثمانينات لمن هم في عمر اتناشر ١٢ سنة فما فوق، بينما لسه بيعتبر دواء بوصفة في بريطانيا، ووضعو التنظيمي في السودان ومصر والخليج بتفاوت بين الصيدليات

بالنسبة للحمل: حبوب الريتينويدات الفموية زي الإيزوتريتينوين ممنوعة قطعاً لأنها بتسبب تشوهات للجنين، أما الكريمات والسيرومات الموضعية فبتتجنب في الحمل كإجراء احتياطي وتوقف عند التخطيط للحمل، والتفصيل كامل حيجي في البوستين ٥٩ و٦٢ في باب الحمل والرضاعة

وفي الحلقة الجاية حنشوف كيف ندخل السماد القوي ده لحواشتنا بهدوء وتدرج، عشان ناخد فايدتو من غير ما نحرق الزراعة ونطلع ببقع جديدة

⚕️ هذا المحتوى للتثقيف الصحي العام ولا يغني عن الاستشارة الطبية. لحالتك الخاصة يمكنك حجز استشارة بالعيادة.
استشارة عبر واتسابتابعنا على تلغرام