
تقلبي ظهر العلبة، وتلقي مكتوب بالبنط العريض «خالي من البارابين»، فتطمني وتشتريها، وبعد أسبوع من المسح وشك يبدأ يحكك ويلسع ويطلع فيهو طفح، المفارقة إنو الناس خافت من المادة الحافظة الكانت بتحمي الكريم، وغفلت عن المتهم الأول والأشهر ورا حساسية وتهيج الوش: العطور
خلينا نفكك هلع المواد الحافظة الأول؛ أي منتج عناية فيهو موية، زي الغسول أو اللوشن أو الكريم، هو بيئة مثالية لنمو البكتيريا والفطريات والعفن أول ما تفتحي العلبة وتدخلي فيها الهواء أو أصابعك، عشان كدة وجود المادة الحافظة هو ضرورة طبية عشان القزازة ما تتحول لمزرعة جراثيم تمسحيها على وشك
البارابين (Parabens) ظل لعقود من أهدأ المواد الحافظة وأقلها تسبيباً للحساسية، لكن حملات التسويق التخويفي شوهت سمعتو، فاضطرت شركات كتيرة تشيلو وتستبدلو بمواد حافظة تانية، النتيجة كانت إنو بعض البدائل دي، وتحديداً مادة اسمها الميثيل أيزوثيازولينون (Methylisothiazolinone)، عملت موجة كبيرة ووباء حقيقي من الحساسية التماسية حول العالم، لحدي ما اضطرت الجهات الرقابية الأوروبية تمنع وجودها تماماً في المنتجات البتقعد على الجلد من غير شطف
أما المتهم الحقيقي البستحق انتباهك لما تقلبي العلبة فهو العطر (Fragrance / Parfum)، العطور هي السبب الأول لحساسية التماس التجميلية وتهيج الحاجز الجلدي، وفي بشرتنا السمراء أي التهاب أو تحسس من عطر ممكن يختم رحلتو ببقعة غامقة، والمهم نعرف إنو جهاز المناعة ما بيفرق بين عطر صناعي وعطر طبيعي؛ يعني الزيوت العطرية النباتية (Essential oils) والمستخلصات الفواحة بتعمل نفس التهيج والحساسية التماسية عند البشرة القابلة للتحسس، وكلمة «طبيعي» على الواجهة ما بتحمي وشك من ردة الفعل
عشان تحمي حواشتك لو كانت حساسة أو متهيجة، لازم تفرقي بين عبارتين على الملصق: «بدون عطر» (Fragrance-free) و«بدون ريحة» (Unscented)، المنتج المكتوب عليهو «بدون عطر» معناهو ما أضافوا ليهو مواد عطرية من الأساس، وده هو الخيار الأضمن ليك، أما المكتوب عليهو «بدون ريحة»، فده غالباً فيهو عطور مخفية أضافوها مخصوص عشان تغطي وتكتم ريحة المواد الكيميائية الأصلية في الكريم، فممكن يسبب ليك حساسية رغم إنك ما شامة فيهو ريحة عطر واضحة
بالنسبة للحمل: بعض الحوامل بتزيد عندهن حساسية الجلد والشم للعطور، عشان كدة اختيار المنتجات المكتوب عليها «بدون عطر» بيكون أنسب وأريح خلال الفترة دي، والتفصيل في البوست ٦١
كدة قفلنا القسم الخامس وعرفنا شنو جوه القزازة، ومن الحلقة الجاية حنفتح القسم السادس، الملف المسكوت عنو والأهم لسلامة بشرتنا وصحتنا، عشان نفرق بميزان الطب والوعي بين علاج البقع وبين تغيير اللون الأصلي
