
بعد ما عرفنا في الجزء الأول إن الزوائد الجلدية هي انعكاس لحالة الأيض والإنسولين والاحتكاك، لازم نجاوب اليوم على أكتر الأسئلة اللي بتتردد في العيادات وتصحح مفاهيم مغلوطة متوارثة، وأولها السؤال الشهير: "يا دكتور، لو شلنا الزائدة الجلدية أو هبشناها، هل بتفقس وتنتشر في باقي الجسم؟ وهل هي بتعدي؟"
الإجابة العلمية القاطعة هي: لا بتعدي ولا بتفقس! منشأ الخرافة دي هو الخلط الكبير عند الناس بين الزوائد الجلدية (Skin tags) وبين الثالول الفيروسي، وتحديداً النوع الخيطي منه (Filiform warts)، الثالول سببه فيروس الورم الحليمي البشري (HPV)، وده فعلاً لو حكيته أو جرحته بموس حلاقة بينقل الفيروس للمناطق المجاورة بالعدوى الذاتية (Autoinoculation)، أما الزائدة الجلدية فما ليها أي علاقة بالفيروسات، والسبب في إن الناس بتفتكر إنها "بتولد" لما يشيلوها، هو إن السبب الداخلي (مقاومة الإنسولين أو الوزن الزائد أو القابلية الوراثية) بيكون لسه موجود وشغال، فالجلد بيستمر في إنتاج زوائد جديدة في نفس المناطق، فيظن المريض إن القديمة هي اللي عدت الجلد السليم!
وهنا بنجي للمحطة الأخطر، وهي طرق التخلص منها في البيت بالوصفات الشعبية والتقليدية، من أقدم الممارسات اللي بنسمعها ونشوف آثارها في العيادات هي "ربط الزائدة الجلدية بخيط أو شعرة" وشدها بقوة لحد ما تتقطع وتقع براها! الفكرة الشعبية هنا مبنية على قطع التروية الدموية (Ischemic necrosis)؛ لكن اللي بيحصل طبياً لما تربطها في البيت بخيط غير معقم، هو إن الزائدة بتموت ببطء شديد على مدار أيام، وفي الفترة دي بتتحول لنسيج ميت ملوث بالبكتيريا العايشة في العرق وثنايا الجلد، فتلتهب وتتورم وتعمل ألم شديد، وممكن تدخل البكتيريا للأنسجة العميقة وتعمل التهاب خلوي (Cellulitis) أو خراج موضعي
الأخطر من الخيط هو اللجوء لـ "قص الزائدة بمقص الأظافر أو موس الحلاقة" مباشرة في البيت باعتبارها حتة جلد صغيرة وميتة! وبتفاجأ المريض لحظتها بـ "النزيف المستمر"؛ لأن الزائدة الجلدية زي ما شرحنا في الجزء الأول، جوه عنقها الرفيع ده في وعاء دموي حقيقي بيغذيها (Feeding blood vessel)، ولما تقصها بدون كيّ أو تخثير طبي، الشريان الصغير ده بينزف بغزارة، بجانب خطر تلوث الجرح المفتوح
ومؤخراً، انتشرت موجة تانية من الخلطات المنزلية والمنتجات التجارية على الإنترنت؛ ناس بتخت على الزائدة الجلدية عصير ليمون، أو خل تفاح مركز، أو معجون توم، أو "لبن العشر"، أو يشتروا قطرات ولصقات مكتوب عليها "مزيل الزوائد الجلدية والثالول" من غير استشارة طبية
كل المواد دي بتشتغل بطريقة واحدة قاسية جداً وهي إحداث "حرق كيميائي" عشوائي؛ الخل والليمون وأحماض الساليسيليك المركزة ما بتعرف تفرق بين الزائدة الجلدية وبين الجلد الرقيق الحساس جداً بتاع الرقبة أو الجفون أو الإبط، والنتيجة اللي بنشوفها دايماً هي حرق كيميائي عميق، وتقرحات مؤلمة، وفي بشرتنا السمراء بيتحول الحرق ده فوراً لبقع سوداء داكنة (Post-inflammatory hyperpigmentation) أو ندبات بارزة (Keloids) بيكون شكلها وعلاجها أصعب بمراحل من الزائدة الجلدية الصغيرة اللي كانت موجودة! وفوق ده كله، أحياناً بيكون النتوء الجلدي ده في الحقيقة شامة (Mole) أو وحمة أو ورم جلدي تاني بيشبه الزائدة الجلدية، والتعامل معاه بالحرق أو القص المنزلي بيشكل خطورة طبية حقيقية
في الجزء التالت والأخير، حنتكلم عن كيف نتعامل معاها بوعي، وكيف نوقف ظهور زوائد جديدة من الأساس، وشنو هي الطرق الطبية الآمنة والسريعة لإزالتها في دقايق ومن غير أي أثر
