كل يوم في جلدنا في خلايا بتموت، وخلايا جديدة بتطلع مكانها، والعملية دي مستمرة طول العمر من غير ما نحس بيها،
الخلايا القاعدية في أسفل البشرة بتنقسم، جزء من الخلايا الجديدة بقعد تحت عشان يواصل الانقسام، وجزء بطلع لفوق بالتدريج لحدي يتحول لخلايا جلد ناضجة وبعد داك الجسم بتخلص منها، التجديد ده مستمر، بس الانقسام نفسو ما متروك لكل خلية تقرر متين تبدأ ومتين تقيف،
جوة الخلية في دورة منظمة اسمها دورة الخلية (cell cycle)، والخطوات بتاعتها مربوطة بإشارات بتقول للخلية اتقدمي، استني، أصلحي الضرر، أو اقيفي هنا
ممكن نتخيل الجلد زي البيت الاتكلمنا عن حيطتو ومونتو في سلسلة الترطيب، بس المرة دي نحن داخلين جوة قوانين البناء نفسو، ما في ساكن مسموح ليهو يهدم حيطة ويبني واحدة جديدة وقت ما عايز، في ترتيب، وتصاريح، ونقاط تفتيش بتراجع الشغل قبال ما يمشي للمرحلة البعدها
نقاط التفتيش دي اسمها نقاط ضبط دورة الخلية (cell-cycle checkpoints)، ومن أهم شغلها إنها تتأكد إن الحمض النووي اتنسخ بصورة تسمح للخلية تواصل، وإن الضرر الخطير ما اتشال معاهو للجيل الجاي من الخلايا
لو حصل ضرر في الحمض النووي، الخلية عندها أكتر من خيار، ممكن توقف الدورة مؤقتا وتدي أنظمة الإصلاح فرصة تصلح المشكلة، ولو الضرر بقى أكبر من الإصلاح، في خلايا بتدخل في الموت الخلوي المبرمج (apoptosis)، يعني الخلية نفسها تدخل مسار منظم ينهيها قبال ما تورث الخلل لخلايا جديدة
الموت هنا جزء من سلامة النسيج، جلدنا محتاج الخلايا تتولد، ومحتاج برضو الخلايا المعطوبة تعرف متين تطلع من الصف
عشان كده السرطان ما ببدأ بمجرد إن خلية انقسمت بسرعة، أصل الحكاية أعمق: خلية بدأت تتجاوز مجموعة من القوانين البتضبط الانقسام، والاستجابة للضرر، والموت المبرمج، والتعامل مع الخلايا الحولا، السرطان في النهاية نتيجة تراكم تغييرات خلت الخلية تتصرف باستقلال أكبر من المفروض
والتغييرات دي غالبا ما بتحصل كلها في ضربة واحدة، الخلية ممكن تكتسب تغيير، وبعد فترة تغيير تاني، ومع كل خطوة بعض الحواجز الواقفة قدام الانقسام غير المنضبط بتضعف، عشان كده تكوين كثير من الأورام عملية بتاخد زمن، وده واحد من الأسباب البخلي العمر عامل خطر مهم في سرطانات كثيرة
هسي عندنا البيت وقوانينو، وعندنا نقاط التفتيش البتحاول تمنع الخطأ من المرور، السؤال الجاي هو الخلل ذاتو: الحاصل شنو لمن التعليمات البتدير النظام تتغير؟
في البوست الجاي حنقابل الجينات البتدي إشارة الحركة والجينات البتشيل رجل الخلية من البنزين، ونشوف كيف طفرة صغيرة ممكن تغير ميزان البيت كلو