القدم السكرية والقرحة المزمنة

لمن الجرح يطول في قدم مريض السكري، التفكير الطبيعي والمنطقي بيمشي طوالي لضعف الدورة الدموية وتأثير السكري على الأعصاب، وده تفكير سليم تماماً في بدايتو

لكن القرحة السكرية الما بتستجيب للعلاجات المتكررة محتاجة سؤال تاني، وتقييم أعمق من مجرد افتراض ضعف في الالتئام، لمن القرحة السكرية، أو القرحة الوريدية في الساق، ترفض تماماً إنها تستجيب للعلاج وتستمر لشهور طويلة رغم ضبط السكر والغيارات الطبية الصحيحة، هنا لازم نشك في احتمال حدوث تحول خبيث داخل القرحة المزمنة دي،لأن الالتهاب المستمر والدمار المتواصل بكسر قوانين الانقسام عند الخلايا، وبحولها لسرطان حرشفي بتغذى على البيئة المنهكة

الطبيب لمن يشك في التحول الخبيث ده ويقرر ياخد خزعة عشان يقطع الشك باليقين، في قاعدة طبية صارمة بتحكم الخطوة دي؛ الأهمية كلها بتكمن في أخذ الخزعة من الحافة البارزة والمقلوبة بتاعت القرحة، موش من قاع الجرح

لأن القاع غالباً بكون مليان بالخلايا الميتة والصديد وما بدينا إجابة دقيقة، أما الحافة فهي المنطقة الفيها الخلايا الحية النشطة، وهي البتدينا الجواب الأكيد تحت المجهر وتكشف لينا الساكن الخرج عن قانون البيت، الرسالة العملية هنا إن القرحة الما بتندمل ما بتتعالج بتبديل نوع المرهم لشهور، بل بفحص النسيج

وفي ممارسة منتشرة عندنا، وعلاقتها بالسرطان ما بالبساطة البتتقال، وحنشوفها بالمنشور الجاي

⚕️ هذا المحتوى للتثقيف الصحي العام ولا يغني عن الاستشارة الطبية. لحالتك الخاصة يمكنك حجز استشارة بالعيادة.
استشارة عبر واتسابتابعنا على تلغرام